Ակնհայտ է, որ իրավապահներն այլ նպատակներ են հետապնդում. Երեմ Սարգսյանը՝ Մխիթար Զաքարյանի բերման ենթարկվելու մասին (տեսանյութ)

Եթե իրավապահները փորձում են հանցագործություններով, ապօրինություններով իբր օրինականություն հաստատել, սա մոլորություն է,  երբևէ նման բան չի կարող լինել: Եթե որևէ մեկը հանցագործություն կամ ապօրինություն է կատարում, չի կարող դիմացինից պահանջել` չանել նման բան, առավել ևս, եթե դա պետական մարմինն է: Այս մասին այսօր լրագրողների հետ զրույցում նշեց Մեղրիի համայնքապետ Մխիթար Զաքարյանի պաշտպան Երեմ Սարգսյանը:

Խոսելով Զաքարյանին առանց ծանուցման բերման ենթարկելու մասին՝ Սարգսյանը նշեց, թե իրավապահ մարմինները իբր փորձել են մի քանի անգամ ծանուցագիր ներկայացնել, սակայն տանն իբրև մարդ չի եղել, չեն կարողացել ծանուցագիր ներկայացնել:

«Ինքնաձիգերով դիմակավորված անձանց ներկայությունն այս իրավիճակի համար լիազորությունների անցում է, ըստ իս, որովհետև մենք չենք կարող այսպիսի իրավիճակում մարդուն պառկացնել գետնին, իբր գործողություն ես իրականացնում: Դու չես կարող հիմնավորել, թե իբր վնասազերծում ես: Եթե վտանգ տեսնենք, այո, կարող ես, բայց ի՞նչն է վտանգը: Պաշտոնական լիազորությունների անցման մեջ տուգանքով պատժվող հանցագործության համար, որը անձի և առողջության համար որեւէ վտանգ չներկայացնող հանցագործություն է, ինքնակամ ներկայացած անձին ոստիկանության շենքի մոտ բռնությամբ իբր բերման ենթարկել, ակնհայտ է, որ այլ նպատակներ է հետապնդում»:

Երեմ Սարգսյանը նշեց, որ Զաքարյանը ձեռքի վնասվածքներ ունի դեռ պատերազմի մասնակցության ժամանակներից. «Բռնության գործադրման ժամանակ ստացած վնասվածքներին հետագայում կանդրադառնամ, բայց միայն այն փաստը, որ գիտեն՝ անձը վնասվածքներ ունի, հրազենային վիրավորում է ստացել, անձին նման ձևով, ձևական բերման ենթարկելը արդեն վկայում է, որ բոլոր նորմերն անցել են»,-ասաց նա և հավելեց, որ այս պահին կալանքի հետ կապված որևէ նոր տեղեկություն չունեն: