Կուբայում տասնամյակների ամենամեծ ցույցերի ընթացքում տասնյակ մարդիկ են ձերբակալվել․ նախագահը մեղադրել է ԱՄՆ-ին և ցուցարարների դեմ պայքարի հրաման տվել (լուսանկարներ, տեսանյութ)

Կուբայում կոմունիստական կառավարության դեմ տասնամյակների ամենամեծ բողոքի ակցիաների ընթացքում տասնյակ ցուցարարներ են ձերբակալվել, հայտնում է BBC լրատվականը՝ հղում տալով լրատվամիջոցներին և ընդդիմության աղբյուրներին և հավելում, որ ցույցերին մասնակցել են հազարավոր մարդիկ՝ զայրացած տնտեսության անկումից, սննդամթերքի և դեղորայքի պակասից, թանկացումներից և կորոնավիրուսի տարածման դեմ պայքարում կառավարության գործողություններից։

Երկրի նախագահն իր կողմնակիցներին կոչ է արել «պայքարել» ցուցարարների դեմ։ Հայտնի է, որ ամբողջ երկրում անջատվել է համացանցը, և անվտանգության ուժերի հետ առճակատման ընթացքում վիրավորվել է Associated Press-ի լուսանկարիչը։

Բողոքի ակցիաների ընթացքում ցուցարարները վանկարկել են «Ազատությո՛ւն» և «Կորչի՛ բռնապետությունը» և նշել, որ փոփոխություն են ցանկանում։

Ի պատասխան երկրում ընթացող ցույցերի՝ նախագահ Միգել Դիազ Կանելը հեռուստատեսությամբ դիմել է ժողովրդին և անկարգությունների համար մեղադրել Միացյալ Նահանգներին և Կուբայի նկատմամբ 1962 թվականից ի վեր գործող պատժամիջոցներն անվանել «տնտեսական խեղդման քաղաքականություն»։

«Պայքարի հրամանը տրված է։ Հեղափոխականնե՛ր, դուրս եկեք փողոց», - ասել է Կուբայի նախագահը։

ԱՄՆ-ի նախագահ Ջո Բայդենը, իր հերթին, նշել է, որ Կուբայի ժողովուրդը համարձակորեն հաստատում է հիմնարար և համընդհանուր իրավունքները, իսկ Վենեսուելայի նախագահ Նիկոլաս Մադուրոն Կուբայի նախագահին և «հեղափոխական կառավարությանը» աջակցություն է հայտնել։ Մեքսիկան և Ռուսաստանի Դաշնությունն էլ նշել են, որ ոչ մի պետություն չպետք է խառնվի Կուբայի ներքին գործերին։

Վերլուծաբանները կարծում են, որ բողոքի ակցիաները դժվար թե համատարած բնույթ կրեն երկրում, իսկ կոմունիստական կառավարությունն էլ, իր հերթին, կանի հնարավոր ամեն բան՝ դրանք դադարեցնելու համար։