Եկեք այդ գումարներն ուղղենք մեր վիրավոր տղաներին և կարողանանք տեղափոխել նրանց եվրոպական առաջատար կլինիկաներ. Նաիրա Զոհրաբյանը՝ պատգամավորների աշխատավարձը բարձրացնելու նախագծի մասին

Համեմատություն կատարել այլ երկրների պատգամավորների աշխատավարձի հետ ու ասել, որ մեր աշխատավարձը բարձր է, դա, իհարկե, այդպես չէ:  Այս մասին ԱԺ-ում ճեպազրույցի ժամանակ ասաց ԲՀԿ պատգամավոր Նաիրա Զոհրաբյանը:

«Ես գտնում եմ, որ պատգամավորները և նրանք, ում վրա որ դրված է պետության կառավարման դերը, պիտի ստանան արժանապատիվ աշխատավարձ, բայց հիմա դրա ժամանակը չէ, հիմա այդ փուլը չէ, հիմա մենք շատ ավելի կենսական խնդիրներ ունենք: Երկրորդ՝ ինձ համար ամենազավեշտալին հիմնավորումն էր, այսինքն պատգամավորական ծախսերի համար նախատեսված 50 հազար դրամը դարձնել 250 հազար դրամ, որպեսզի պատգամավորը գնա և կարողանա հանդիպել իր ընտրողի հետ: Հիմա ես ձեզ խորհուրդ եմ տալիս իջնել կադրերի բաժին և հարցնել, ամենաշատը քանի պատգամավորի է նամակ ուղարկում քաղաքացին, ում է դիմում քաղաքացին և այդ եռյակի մեջ ես կլինեմ առաջիններից մեկը: Ինձ որևէ լրավճար պետք չի եղել մեր հայրենակիցների հետ հանդիպելու համար»,- ասաց պատգամավորը:

Նրա խոսքով՝ ինքը երեկ եղել է Արմավիրում, հանդիպել է ռազմագերիների ծնողների հետ և համաձայնել է այն ռազմագերիների ծնողների հետ, ովքեր, ըստ ծնողների, անցել են Իրանի սահմանը, մեկնել Թավրիզ:

«Դրա համար ինձ որևէ պատգամավորական լրավճար պետք չի, ավելին՝ կարծում եմ, այդ օրերին ես պատգամավոր չեմ լինի, բայց իմ կազմակերպությամբ, որն արդեն գրանցված է կշարունակեմ իմ հասարակական ու քաղաքական ակտիվ գործունեությունը: Այնպես որ, կարծում եմ, որ խորհրդարանը պիտի մերժի այս նախագիծը, քանի որ պատգամավորը պարտավոր է, դա պատգամավորի իմպերատիվ պարտականությունն է հանդիպել ընտրողների ու քաղաքացիների հետ և դրա համար պատգամավորները ստանում են աշխատավարձ»,-ասաց Զոհրաբյանը:

Նրա խոսքով՝ սահմանադրությամբ ստանձնած գործառույթները կատարելու համար հատուկ լրավճարը հատկապես հիմա տեղին չէ:

«Եկեք այդ գումարներն ուղղենք մեր վիրավոր տղաներին և կարողանանք տեղափոխել եվրոպական առաջատար կլինիկաներ»,- ասաց պատգամավորը:

Մանրամասները՝ տեսանյությում