Աֆղանստանի քաղաքներից մեկի բնակիչներին կոչ են արել հեռանալ՝ «Թալիբանի» դեմ նախապատրաստվող գործողություններին ընդառաջ

Պաշարման մեջ գտնվող աֆղանական քաղաքի բնակիչներին կոչ են արել հեռանալ քաղաքից բանակի՝ «Թալիբան» շարժման դեմ նախապատրաստվող գործողություններին ընդառաջ:

Ինչպես տեղեկացնում է BBC News-ը, գեներալ Սամի Սադաթը, որն առաջնորդում է ճակատամարտն՝ ընդդեմ «Թալիբանի» Հիլմենդ նահանգում, տեղի բնակիչներին կոչ է արել հնարավորինս շուտ հեռանալ նահանգի մայրաքաղաք Լաշքարգահից:

ՄԱԿ-ի տվյալներով՝ վերջին մեկ օրում ընթացող ակտիվ ռազմական գործողությունների հետևանքով Լաշքարգահում առնվազն 40 քաղաքացիական անձ է սպանվել: Հաղորդվում է, որ «Թալիբանը» գրավել է քաղաքի մեծ մասը:

Մարտերը, սակայն, շարունակվում են, և կառավարական ուժերը պայքարում են քաղաքը թալիբներին չհանձնելու համար:

Թալիբները վերջին մի քանի ամսում առաջխաղացում են գրանցել երկրի մի շարք շրջաններում: Արմատական շարժման գրոհայինների առաջխաղացումը տեղի է ունենում ամերիկյան զորքերի՝ 20 տարվա ներկայությունից հետո Աֆղանստանից դուրս գալուն զուգահեռ: