Բրիտանական Պլիմուտում հրաձգության կասկածյալը տառապում էր «կանանց համար գրավիչ չլինելու» հանգամանքից (լուսանկարներ, տեսանյութ)

Բրիտանական Պլիմուտում հրաձգության կասկածյալը՝ 23-ամյա Ջեյք Դևիսոնը, բոդիբիլդեր էր, որը չափազանց ծանր էր տանում անձնական կյանքում հաջողություն չունենաու, կանանց համար գրավիչ չլինելու փաստը, գրում է Daily Mail-ը:

Նա անընդհատ բողոքում էր ընկերուհի չունենալուց: Բրիտանացին մի առիթով բողոքել է, որ իր կյանքում փոփոխություն չկա և որ ինքը «առաջվա պես, գրողի տարած, ճարպոտ, տգեղ կույսն է»:

Հրաձգությունից մի քանի շաբաթ առաջ արված յութուբյան տեսանյութում կասկածյալը նկարագրել է, թե ինչպես է «ինքը պարտվել կյանքին» և իր խնդիրների համար մեղավոր է նշում ընկերուհու բացակայությունը:

Հուլիսի 28-ի իր վերջին տեսանյութում կասկածյալը 11 րոպե խոսել է այն մասին, թե ինչպես է իր կյանքը կանգնել, մինչ ինքը պայքարում է կանանց գրավելու կամ նիհարելու համար:

Հիշեցնենք, որ Պլիմուտում հրաձգության միջադեպի հետևանքով զոհվել է առնվազն վեց մարդ, այդ թվում ՝ կասկածյալը, հայտնել են Դևոնի և Քորնուոլի ոստիկանները:

«Հաղորդվում է վեց զոհի, այդ թվում՝ կասկածյալի մասին ... Երկու կին և երկու տղամարդ մահացել են տեղում: Մեկ այլ տղամարդ, ենթադրաբար հարձակվողը, նույնպես մահացել է տեղում: Բոլորը, ենթադրաբար, մահացել են հրազենային վնասվածքներից», - հայտնել է ոստիկանությունը Facebook- ում:

Ոստիկանությունը դեռ չի հայտնում միջադեպի պատճառների մասին, սակայն չի դիտարկում ահաբեկչության վարկածը կամ այլ կասկածյալների հավանական ներգրավվածությունը: Նախաքննությունը շարունակվում է: