Ֆրանս-ավստրալական սկանդալը խորանում է. Ավստրալիայի վարչապետը հրապարակել է Մակրոնից ստացած անձնական հաղորագրությունը, ինչը զայրացրել է Փարիզին
Ելիսեյան պալատի պաշտոնյաներին կատաղեցրել է այն հանգամանքը, որ Ավստրալիայի վարչապետ Սքոթ Մորիսոնն արտահոսել է Ֆրանսիայի նախագահից՝ Էմանուել Մակրոնից, ստացած անձնական տեքստային հաղորդագրությունը: Եվ դա տեղի է ունեցել երկու երկրների միջև դիվանագիտական վեճի խորացման ֆոնին, նկատում է The Guardian-ը:
«Վստահությունն ամբողջությամբ կոտրվել է: Պետությունների կամ կառավարությունների ղեկավարների միջև տեքստային հաղորդագրությունների փոխանակման բացահայտումը բավականին կոպիտ և ոչ սովորական մարտավարություն է», - ֆրանսիական լրատվամիջոցներին ասել է Մակրոնի մերձավոր խորհրդականը:
Խորհրդականը Le Parisien-ին ասել է, որ Ֆրանսիայի նախագահի «մտքով նույնիսկ չէր էլ անցնի» նման հաղորդագրությունները բացահայտել:
«Սա այնպիսի բան չէ, որը հավանաբար կբարելավի Ֆրանսիայի և Ավստրալիայի հարաբերությունները», - ասել է նա:
Աղբյուրը մանրամասնում է, որ հաղորդագրության տեքստում, որը Մակրոնն Ավստրալիայի վարչապետին ուղարկել է ԱՄՆ-ի, Մեծ Բրիտանիայի և Ավստրալիայի միջև AUKUS անվտանգության գործընկերության մասին հայտարարումից և դրա ֆոնին Ավստրալիայի կողմից ֆրանսիական սուզանավերի մատակարարման բազմամիլիարդանոց պայմանագրի չեղարկումից երկու օր առաջ, Ֆրանսիայի նախագահը հարցնում է Մորիսոնին՝ լա՞վ, թե՞ վատ նորություններ սպասի սուզանավերի պայմանագրի վերաբերյալ:
Նշվում է, որ հաղորդագրության հետ կապված սկանդալից մեկ օր առաջ, Մակրոնը հայտարարել էր, որ Մորիսոնն իրեն խաբել է: Մակրոնը հայտարարել էր, որ Ավստրալիայի վարչապետը ստել է իրեն, երբ գաղտնի բանակցում էր ԱՄՆ-ի և Բրիտանիայի հետ սուզանավերի գործարքի շուրջ:
Հայտնի է, որ Ֆրանսիայի և Ավստրալիայի միջև լարվածություն է առաջացել Ավստրալիայի, Միացյալ Թագավորության և Միացյալ Նահանգների միջև նոր AUKUS գործընկերության պատճառով: Ավստրալիան, այս եռակողմ գործընկերության կնքման լույսի ներքո, հայտարարել է ֆրանսիական Naval Group ընկերության հետ սուզանավերի մասին համաձայնագրից դուրս գալու մասին: Համաձայնագրի արժեքը կազմում էր 56 միլիարդ եվրո։ Սա տհաճ անակնկալ է եղել Փարիզի համար:
AUKUS պակտը վրդովեցրել է Ֆրանսիային, որն ԱՄՆ-ում և Ավստրալիայում իր դեսպաններին հետ էր կանչել՝ կորցրած գործարքի պատճառով:
Մակրոնն ու Մորիսոնը Հռոմում առաջին անգամ զրուցել են այն բանից հետո, երբ Ավստրալիան չեղարկել է ֆրանսիական սուզանավերի պայմանագիրը։ Նրանք երկուսն էլ Հռոմում էին G20 երկրների խմբի գագաթնաժողովին մասնակցելու համար, սակայն երկկողմ հանդիպում չեն անցկացրել:










