Վերջերս եկել էին Տիգրանաշենում տուն առնելու, Երևանի գների նման գին ասացին. այնտեղ ապրելու բոլոր պայմանները կան. Արարատի մարզպետ
Նման բան չկա: Այս մասին լրագրողների հետ ճեպազրույցում ասաց Արարատի մարզպետ Ռազմիկ Թևոնյանը՝ անդրադառնալով դիտարկմանը, թե որպես մարզպետի պաշտոնից հրաժարականի դիմումի պատճառ ներկայացվում էին Գարիկ Սարգսյանի հետ ունեցած տարաձայնությունները:
«Գարիկ Սարգսյանն իմ որդու տարիքին է, նրա հայրն էլ իմ ընկերն է, նման բան լինել չի կարող»,-ասաց նա: Ճշտող հարցին՝ Մասիսի քաղաքապետի թեկնածուի վերաբերյալ տարաձայնություն չի՞ եղել, Թևոնյանը բացասական պատասխան տվեց:
Մեկ այլ լրագրողի հարցին էլ՝ ի՞նչն էր հրաժարականի դիմումի պատճառը, մարզպետն արձագանքեց. «Պատճառը դու էիր»:
Դիտարկմանը, թե պարբերաբար քննարկվում է Տիգրանաշենը, և հարցին՝ եթե այն դառնա բանակցության առարկա, Թևոնյանն ի՞նչ է անելու, հատկապես, երբ այնտեղ նաև առանձնատուն ունի, Արարատի մարզպետն արձագանքեց. «Բա որ դու էդքան բանը գիտես, ինչու՞ ես այդպիսի հարց տալիս ինձ: Դա չի կարող լինել, նման հարց չկա և չի էլ կարող լինել»,-ասաց նա՝ հերքելով, թե Տիգրանաշենը դատարկվում է:
«Վերջերս Վայքից մի մարդ եկել էր տուն առնելու, Երևանի գների նման գին ասացին: Տիգրանաշենում բոլոր մարդիկ ապրում են, այնտեղ ապրելու բոլոր պայմանները կան, ու ապրելու են: Իմ առանձնատունը սարքելն ինձ վրա «նստել է» 200 հազար դոլար, 1997-ին եմ սարքել»,-ասաց նա:
Հարցը, թե հիմա վաճառելու դեպքում որքան կարժենա իր տունը, Թևոնյանը որակեց անտակտ: Լրագրողի հարցին՝ ինչո՞ւ է Թևոնյանն անհարգալից խոսում, Արարատի մարզպետը պատասխանեց. «Որովհետև դուրս չես գալիս, արա՛»:










