Համարել ենք, որ եթե ընդառաջենք Մայր Աթոռի առաջարկին, ապա ռեֆորմն իր իմաստն ընդհանրապես կկորցնի․ Վահան Քերոբյանը՝ հունվարի 5-ը և 7-ը աշխատանքային դարձնելու մասին (տեսանյութ)
Ես չեմ ասել, որ Մայր Աթոռի հետ քննարկումներ ենք արել։ Այս մասին լրագրողների հետ ճեպազրույցում ասաց էկոնոմիկայի նախարար Վահան Քերոբյանը՝ անդրադառնալով Ամանորի ոչ աշխատանքային օրերի կրճատմանը։
«Իրենք խնդրում էին, որ հունվարի 5-ը և 7-ը ևս լինեն ոչ աշխատանքային։ Այդ հարցը քննարկվել է թիմի ներսում, կուսակցության հետ, և մենք համարել ենք, որ եթե ընդառաջենք Մայր Աթոռի առաջարկին, ապա ռեֆորմն իր իմաստն ընդհանրապես կկորցնի։ Այդ տեսանկյունից ոչ նպատակահարմար ենք համարել Մայր Աթոռի առաջարկն ընդունելը»,-ասաց նախարարը։
Քերոբյանը նշեց, թե մանրամասնորեն ներկայացրել են, թե ինչպես կփոխվի տնտեսության կառուցվածքը հունվարին։
Դիտարկմանը, թե իրենք համաձայնել են հունվարի 2-ը ևս ոչ աշխատանքային դարձնել, այդ դեպքում ինչու՞ այդ օրվա փոխարեն հունվարի 5-ը չեն դարձրել ոչ աշխատանքային՝ ընդառաջելով Գարեգին Բ-ին, Քերոբյանն արձագանքեց, թե տարբեր առաջարկներ են եղել տարբեր ուժերից, և դրանց ուսումնասիրության արդյունքում ընտրվել է այս տարբերակը։
Քերոբյանը վստահություն հայտնեց, որ օրենքը նախագահի կողմից կստորագրվի։










