Քրեական դատավարությունը, որպես հարյուրավոր տարիներ գոյություն ունեցող երևույթ, հեղինակազրկվում է․ Գևորգ Բաղդասարյանը՝ Արմեն Գևորգյանի՝ դատական նիստերին չներկայանալու մասին

13:55 • 01.03.22

Մեզ համար հասկանալի չէ դատարանում ներկա պահին քննարկվող և մինչ այդ ներկայացված միջնորդության կապը, որի համար Դուք հեռացել էիք խորհրդակցական սենյակ։ Երկրորդ նախագահ Ռոբերտ Քոչարյանի և նախկին փոխվարչապետ, այժմ՝ ԱԺ պատգամավոր Արմեն Գևորգյանի գործով դատական նիստի ժամանակ, դիմելով դատավոր Աննա Դանիբեկյանին, ասաց Գլխավոր դատախազի տեղակալ Գևորգ Բաղդասարյանը։

Հիշեցնենք, որ Քոչարյանի պաշտպաններից Ալումյանը միջնորդել է դիմել Սահմանադրական դատարան՝ պնդելով, որ այն, որ դատարանը օրենքով հնարավորություն չունի պարզաբանելու Ռ․ Քոչարյանին և Արմեն Գևորգյանին առաջադրված մեղադրանքը, հակասում է Սահմանադրության 67-րդ հոդվածի 1 կետին և 63 հոդվածի 1 մասին։
Դանիբեկյանը հղում արեց Քր․ Դատ․ -ի 31 հոդվածի 4 մասին, որի համաձայն քրգործի վարույթը կարող է կասեցվել անհրաժեշտ հնարավոր բոլոր դատավարական գործողությունները կատարելուց հետո։ Այս դեպքում դատարանը գտել է, որ առկա են դատավարական գործողություններ, որոնց դատարանը դեռ պետք է անդրադառնա։ 

Նախագահող դատավորը տեղեկացրեց, որ գործով անցնող «Հայաստան» խմբակցության պատգամավոր Արմեն Գևորգյանը միջնորդություն է ներկայացրել երկրից ժամանակավորապես բացակայելու վերաբերյալ։ Դատարանը գտել է, որ նախկան այդ միջնորդության լուծումը Հայկ Ալումյանի միջնորդությունը չի կարող լուծում ստանալ։

«Ձեր խոսքի մեջ միտք կար, որ քանի որ քրեական գործի վարույթը կասեցնելուց առաջ բոլոր անհրաժեշտ գործողությունները պետք է կատարված լինեն, մեզ մոտ տպավորություն առաջացավ, որ Դուք խորհրդակցական սենյակում որոշել եք կասեցնել, բաց մինչև կասեցնելը վերադարձել եք Արմեն Գևորգյանի դատական նիստերի մասնակցության հարցը լուծելու, եթե՝ ոչ, ապա որևէ կապ այս պահին քննարկվող և խորհրդակցական սենյակում Ձեր գտնվելու ժամանակ քննարկված միջնորդության հետ կապված հարցերի միջև չենք տեսնում։

Ինչ վերաբերվում դատական նիստերին բացակայությանը և հետագայում դատական նիստերին ներկայանալու անհնարինությանը, ապա սա այն է, ինչի մասին մենք խոսել ենք։ Այն, ինչ միջնորդության տեսքով ներկայացվեց, կարելի է ձևակերպել շատ ավելի կարճ՝ ինձ աշխատանքային ժամերին հարմար չէ ներկայանալ դատական նիստրին և ինձ հարմար չէ դատական նիստերին ներկայանալ, որովհետև ես աշխատանքի չեմ։ Եթե չմեջբերեմ Քրեական դատավարության որևէ նորմ դատական նիստերին պարտադիր լինելու մասին, ապա գործընթացը քրեական դատավարության հետ որևէ առնչություն չունի։ Քրեական դատավարությունը, որպես հարյուրավոր տարիներ գոյություն ունեցող երևույթ, հեղինակազրկվում է, որևէ մեկի պարտականությունների կատարումը, հանդիպումները, քննարկումները չեն կարող իրեն փաստացի ազատել մեղադրյալի կարգավիճակից փաստացի»,- ասաց Բաղասարյանը։

Վերջինս առարկեց ներկայացված միջնորդության դեմ։

Հիշեցնենք, որ Երևանի ընդհանուր իրավասության դատարանի Շենգավիթի նստավայրում տեղի է ունենում ՀՀ երկրորդ նախագահ Ռոբերտ Քոչարյանի և նախկին փոխվարչապետ, այժմ՝ ԱԺ պատգամավոր Արմեն Գևորգյանի գործով դատական նիստը։