Հավասար պայմաններում նույն ծավալի գազի սպառման դեպքում սպառողի կողմից վճարվող գումարը չի փոփոխվելու․ փոխվարչապետ

17:02 • 02.03.22

Աշխարհում գնաճային երևույթները այնպիսին են, որ հավելյալ թիրախային միջոցառումների խնդիրներ կունենանք, այդ հարցը օրակարգային է, ըստ իրավիճակի կիրականացվեն միջոցառումներ։ Այս մասին Կառավարության հետ հարցուպատասխանի ժամանակ, ի պատասխան գազի սակագնի բարձրացման վերաբերյալ «Հայաստան» խմբակցության պատգամավոր Թադևոս Ավետիսյանի հնչեցրած հարցին, ասաց փոխվարչապետ Մհեր Գրիգորյանը։

«Ապրիլի 1-ից գազի սակագնի բարձրացման հետ կապված ուզում եմ հիշեցնել, որ գազի սակագինը ճշգրտվում է կալորիականության հաշվարկով, ինչը նշանակում է, որ հավասար պայմաններում և իրականության մեջ նույն ծավալի սպառման պայմաններում վճարվելիք գումարը չի փոփոխվելու, սա կարևոր նյուանս է, որը պետք է հաշվի առնել։

Մեր սահմանին 165 դոլար գնի պարագայում Եվրոպայում այսօր 1400 դոլար է։ Այդ իմաստով կարծում եմ, որ ճնշումները բալասնավորված կլինեն, իրավիճակի կոորդինատները ի հայտ գալու պարագայում կհասկանանք՝ որտեղ է անհրաժեշտ թիրախային միջոցառումներ իրականացնել և կիրականացնենք»,- ասաց փոխվարչապետը։

Գրիգորյանի կարծիքով՝ բյուջեի պահուստաֆոնդը բավարար է նման միջոցառումները ֆինանսավորելու համար։