«Մենք սատարում ենք Ռուսաստանին». Բաղդադում Պուտինի պատկերով հսկայական պաստառ է փակցվել

15:03 • 03.03.22

Բաղդադի ամենաբանուկ փողոցներից մեկում Ռուսաստանի նախագահ Վլադիմիր Պուտինի պատկերով հսկայական պաստառ է փակցվել, որն ակտիվ քննարկումներ է առաջացրել իրաքյան հասարակության մեջ, հայտնում է Anadolu գործակալությունը:

«Մենք սատարում ենք Ռուսաստանին» և «Նախագահի ընկերներ» մակագրություններով պաստառը հինգշաբթի գիշեր անհայտ անձանց կողմից փակցվել է Կարադայի մետրոպոլիայի տարածքում։

Կեսօրին հատուկջոկատայիններն ապամոնտաժել են պաստառը, սակայն մինչ այդ շատերն արդեն հասցրել էին լուսանկարել այն ու տեղադրել սոցիալական ցանցերում։

Իրաքի կառավարությունը այս կապակցությամբ հայտարարություն չի արել։

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»։

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։