Խաղաղության մասին Հայաստանի և Ադրբեջանի ունեցած պատկերացումները համարժեք են․ Անդրանիկ Քոչարյան
Արցախում մարտի 7–ի գիշերը և մարտի 8–ին եղել են ականանետային կրակոցներ, որոնց վերաբերյալ տրվել է պաշտոնական հաղորդագրություն, դրանից ավել որևէ գործողություն չի եղել, վիրավորներ, զոհեր չունենք, իսկ Լիսագորի հատվածում վնասվել է գազատարը։ Անդրադառնալով վերջին օրերին Արցախում ադրբեջանցիների կողմից իրականացրած սադրանքներին և գյուղերի ուղղությամբ կրակելու դեպքերին` ասաց իշխող «Քաղաքացիական պայմանագիր» խմբակցության պատգամավոր, Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը:
«Քանի որ հրադադարի ռեժիմի պահպանման երաշխավորը ՌԴ–ն է, որը մեկ այլ վայրում գտնվում է ռազմական գործողությունների ակտիվ փուլում, գուցե հակառակորդը, դրանից օգտվելով, որոշ դժվարություններ է փորձում առաջացնել արցախյան հատվածում։ Ամենայն հավանականությամբ այդ խնդիրները ՌԴ–ի և Ադրբեջանի միջև երկխոսության միջոցով կստանան իրենց լուծումները»,– ասաց Քոչարյանը։
Վերջինս վստահ է՝ խաղաղության դարաշրջանի վերաբերյալ՝ Հայաստանի և Ադրբեջանի ունեցած պատկերացումները համարժեք են։
Ինչ վերաբերում է օրերս Երասխում հակառակորդի կողմից հրադադարի ռեժիմի խախտմանը, որի արդյունքում հայկական կողմն ունեցավ զոհ և վիրավոր, Անդրանիկ Քոչարյանը նշեց․
«Նախկինում էլ կային զոհեր, պետք է ամեն մի դեպքը ուսումնասիրվի, որովհետև դա խախտում է այն տրամաբանությունը, որ կան հրադադարի պահպանման պայմանավորվածություններ։ Յուրաքանչյուր դեպք պետք է ուսումանսիրվի և մեղավորները պետք է պատժվեն»։










