ԱՄՆ-ը կաջակցի Իրաքին՝ Իրանին Էրբիլում հրթիռային հարձակման համար պատասխանատվության ենթարկելու հարցում

07:52 • 14.03.22

Միացյալ Նահանգներն Իրաքի վարչապետի ու Քուրդիստանի ղեկավարների հետ դատապարտում են Էրբիլում՝ իրանի իրականացրած հրթիռային հարձակումն ու մտադիր են աշխատել Իրանին պատասխանատվության ենթարկելու ուղղությամբ։ Այս մասին, ինչպես հաղորդում է ՌԻԱ Նովոստին, հայտարարել է ԱՄՆ նախագահի՝ ազգային անվտանգության հարցերով խորհրդական Ջեյք Սալիվանը։

Սալիվանն ընդգծել է, որ ԱՄՆ-ն դատապարտում է հրթիռային հարձակումը Քրդստանում, որի հետևանքով առանց որևէ հիմնավորման Էրբիլում բնակելի շենք է հրթիռակոծվել։

«Միացյալ Նահանգները վարչապետ ալ-Կազիմի և Քուրդիստանի ղեկավարներ նախագահ Նեչիրվան Բարզանիի ու վարչապետ Մասուր Բարզանիի հետ դատապարտում են Իրաքի և իրաքյան Քուրդիստանի շրջանի ինքնիշխանության դեմ այս ոտնձգությունը։ Մենք աջակցելու ենք Իրաքի կառավարությանը Իրանին պատասխանատվության ենթարկելու հարցում և աջակցելու ենք Մերձավոր Արևելքի մեր գործընկերներին Իրանի կողմից նման սպառնալիքներին դիմակայելու հարցում», - նշվել է Սալիվանի հայտարարության մեջ։

Իրաքի իշխանությունները բացատրություն են պահանջել Իրանից  իրաքյան Քուրդիստանի հրթիռակոծման կապակցությամբ և բողոքի նոտա են հղել Բաղդադում Իրանի դեսպանին։

Հիշեցնենք, որ Էրբիլի ուղղությամբ հրթիռային հարվածը հասցվել է մարտի 13-ին։ Այն շրջանի ուղղությամբ, որտեղ տեղակայված է ԱՄՆ հյուպատոսարանի նոր շենքը, 12 բալիստիկ հրթիռ է արձակվել։ Զոհեր ու վիրավորներ չկան։

Էրբիլին հրթիռային հարված հասցնելու պատասխանատվությունը ստանձնել է Իրանի Իսլամական հեղափոխության պահապանների կորպուսը։ Կորպուսի ներկայացուցիչների խոսքով՝ Իրաքի տարածքում հրթիռային հարձակման թիրախում Իսրայելի օբյեկտներ են եղել։