Անօդաչուն թռչնի թռիչքի բարձրությունից ցույց է տվել ավերածություններն Ախտիրկայում (տեսանյութ)
Ուկրաինայի Սումիի շրջանի Ախտիրկա քաղաքը ՌԴ-ի սկսած հատուկ ռազմական գործողության առաջին իսկ օրերից ենթարկվել է հզոր հարվածներին, գրում է korrespondent.net-ը՝ մանրամասնելով, որ համացանցում է հայտնվել ավերված քաղաքի տեսանյութը՝ նկարահանված անօդաչու թռչող սարքի միջոցով։
Աղբյուրը գրում է, որ փետրվարի 28-ին ռուսական զորքերը Ախտիրկայում պայթեցրել էին նավթի պահեստը, իսկ մարտի 1-ին ռմբակոծել էին զորամասը։ Բացի այդ, բազմիցս հարվածներ են հասցվել բնակելի թաղամասերին և քաղաքի ենթակառուցվածքին։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:










