Մոլդովան արգելել է գեորգիևյան ժապավենը, Z և V խորհրդանիշները

09:24 • 08.04.22

Մոլդովան արգելել է գեորգիևյան ժապավենը, ինչպես նաև Z և V խորհրդանիշները, որոնք ռուսական զորքերն օգտագործում են Ուկրաինայում սկսած հատուկ ռազմական գործողության ժամանակ։ Ինչպես գրում է  NewsMaker-ը, օրենսդրության փոփոխությունները հավանության են արժանացել երկրի խորհրդարանի կողմից։

Պատգամավորները կողմ են քվեարկել նաև իրավախախտումների օրենսգրքում փոփոխություններին, որոնց համաձայն՝ արգելված խորհրդանիշներ արտադրող, ցուցադրող կամ տարածող ֆիզիկական և իրավաբանական անձինք կտուգանվեն։

Ֆիզիկական անձանց սպառնում է մինչև 9000 լեյ (490 դոլար) տուգանք կամ մինչև 60 ժամ հասարակական աշխատանք, իսկ իրավաբանական անձանց՝ 18 000 լեյ (980 դոլար):

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին: Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։

Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա: