Հակամարտությունը ռազմական ճանապարհով լուծելու մասին Բորելի հայտարարությունը փայլուն նվեր է Կիևի ռեժիմին, որը չի խուսափում արյունալի սադրանքներից. Սլուցկի
ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելի հայտարարությունը՝ Ուկրաինայում հակամարտությունը ռազմական ճանապարհով լուծելու անհրաժեշտության մասին, կրկնում է Վաշինգտոնի նմանատիպ հայտարարությունները՝ դառնալով «փայլուն նվեր Կիևի ռեժիմի համար»: Այս մասին հայտարարել է Պետդումայի միջազգային հարցերով հանձնաժողովի նախագահ Լեոնիդ Սլուցկին, գրում է ՏԱՍՍ-ը:
«Բորելը Կիև կատարած այցից հետո հայտարարություն արեց, որից հետո Պետդումայի նախագահ Վյաչեսլավ Վոլոդինն առաջարկեց անհապաղ պաշտոնանկ անել նրան: Պատերազմը «պետք է հաղթել մարտի դաշտում», - ասաց Բորելը: Սա փայլուն նվեր է Կիևի ռեժիմին, որը չի խուսափում արյունալի սադրանքներից, բնակելի թաղամասերի հրթիռակոծություններից, ռազմագերիների խոշտանգումներից և մահապատժից։ Եվրոպական դիվանագիտության ղեկավարը հասկանո՞ւմ է, թե որ կողմն է բռնել»,- գրել է Սլուցկին՝ իր թելեգրամյան ալիքում:
Նրա խոսքով, ԵՄ պաշտոնյան այս դեպքում կրկնում է ԱՄՆ ղեկավարության կոչերը, որոնք «իրոք ցանկանում են Ռուսաստանի պարտությունը և ուղղակիորեն նպաստում դրան»՝ համաշխարհային հեգեմոնիա հաստատելու համար։
«Այժմ Բրյուսելը արձագանքում է Վաշինգտոնին, և իր գլխավոր դիվանագետի բերանով»,- նշել է Սլուցկին՝ հավելելով, որ Արևմուտքում պաշտոնյաները սկսել են շատ վտանգավոր հռետորաբանություն կիրառել։
Նշենք, որ ապրիլի 8-9-ը Ուկրաինա կատարած այցից հետո Բորելը թվիթերում գրառում է կատարել Ուկրաինային ամբողջական աջակցություն ցուցաբերելու պատրաստակամության մասին, այդ թվում՝ զենքի մատակարարումների տեսքով, և հավելել, որ այս պատերազմը «պետք է հաղթել մարտի դաշտում»։










