Ռուսաստանում քրեական գործ է հարուցվել «Ի՞նչ, ո՞րտեղ, ե՞րբ»-ի ադրբեջանցի գիտակի նկատմամբ՝ մարշալ Ժուկովին «գող» անվանելու համար

ՌԴ քննիչները քրեական գործ են հարուցել «Ի՞նչ, ո՞րտեղ, ե՞րբ» հեռուստախաղի ադրբեջանցի գիտակ Ռովշան Ասկերովի դեմ նացիզմի վերականգնման վերաբերյալ սոցիալական ցանցերում հրապարակումների համար, ՌԻԱ «Նովոստի»-ին հայտնել են ՌԴ Քննչական կոմիտեում։

ՌԴ Քննչական կոմիտեն պարզել է, որ ապրիլի 6-ը Ասկերովը ֆեյսբուքյան էջում հրապարակել է  Խորհրդային Միության մարշալ Գեորգի Ժուկովի հիշատակը վիրավորող և վարկաբեկող կեղծ տեղեկատվություն։ 

Ադրբեջանցուն մեղադրանք է առաջադրվել ՌԴ Քրեական օրենսգրքի 354.1 հոդվածի չորրորդ մասով՝ ըստ դրա՝ նրան սպառնում է մինչև հինգ տարվա ազատազրկում։ 

Ասկերովը ֆեյսբուքյան գրառման մեջ Ժուկովին անվանել է «փորձառու կողոպտիչ, գող և համազգեստով մարդասպան»։