Թրամփը կարծում է, որ Ուկրաինայում հատուկ ռազմական գործողության իրականացումը հնարավոր դարձավ Բայդենի թուլության պատճառով
ԱՄՆ նախկին նախագահ Դոնալդ Թրամփը կարծում է, որ Վաշինգտոնի վարչակազմի ներկայիս ղեկավար Ջո Բայդենը թուլություն ու անկոմպետենտություն է ցուցաբերել Ուկրաինայի հարցում։ Այս մասին, ինչպես գրում է ՏԱՍՍ գործակալությունը, նա ասել է կիրակի՝ մայիսի 1-ին, Նեբրասկա նահանգում իր կողմնակիցների հետ հանդիպման ժամանակ։
Թրամփի կարծիքով՝ Ռուսաստանը որոշել է Ուկրաինայում հատուկ գործողություն իրականացնել այն բանից հետո, ինչ ԱՄՆ-ն իր զորքերը դուրս է բերել Աֆղանստանից։
«Իմ օրոք նրանք երբեք դա չէին անի», - հայտարարել է ԱՄՆ նախկին նախագահը՝ շեշտելով, որ ՌԴ ղեկավարությունը տեսել է Բայդենի թուլությունն ու անկոմպետենտությունը, ինչն իր նախագահության օրոք երբեք տեղի չէր ունենա։
Նա նաև նշել է, որ ներկայիս ղեկավարության օրոք Միացյալ Նահանգները կորցրել է էներգետիկ անկախությունն ու ստիպված է եղել «գթություն խնդրել» Ռուսաստանից ու ՕՊԵԿ-ից։
Նրա խոսքով անգամ հինգ վատագույն նախագահներն ԱՄՆ պատմության ընթացքում այդքան վնաս չեն հասցրել երկրին, որքան Բայդենն ընդամենը 16 ամսում։
«Սա կատարյալ ձախողում էր, հսկայական ձախողում։ Ուշադրություն դարձրեք փաստերին», - նշել է Թրամփը՝ հավելելով, որ իր շնորհիվ ԱՄՆ-ն էներգետիկ անկախություն ուներ։










