Առավոտյան 08։00-ից շարունակում ենք բողոքի, խաղաղ անհնազանդության ակցիաները. Իշխան Սաղաթելյան
«Միասին ծանր ու դժվար գործ ենք սկսել, բայց վստահ եղեք, որ միասին այս գործն ավարտելու ենք հաղթանակով, որովհետև պինդ եք, ամուր ու վճռական եք, մենք միասնական ենք»,- Ֆրանսիայի հրապարակում հանրահավաքի ժամանակ հայտարարեց ՀՅԴ ԳՄ ներկայացուցիչ Իշխան Սաղաթելյանը։
Սաղաթելյանի խոսքով, այսօր նորից փաստել են՝ այս շարժումը կասեցնել հնարավոր չէ. «Այսօր 600-ից ավելի բերման ենթարկվածներ ենք ունեցել, հիմա բոլորն այստեղ են։ Պետք է համախմբենք, շատանանք ու այս գործը հասցնենք իր հաղթական ավարտին»։
Վաղն առավոտյան 08։00-ից շարունակում ենք բողոքի, խաղաղ անհնազանդության ակցիաները, Ֆրանսիայի հրապարակում հանրահավաքի ժամանակ հայտարարեց Իշխան Սաղաթելյանը։
Նա հրապարակեց, թե 08։00-ին որ վայրերից են շարժվելու խմբերը և որտեղ պետք է հավաքվեն քաղաքացիները․
Գարեգին Նժդեհի հրապարակ,
Կոմիտաս, եկեղեցու մոտ
Ավան, «Հարսնաքար» համալիրի մոտ
Նորքի զանգված՝ «Մեգամոլի» դիմաց
Սասունցի Դավթի արձանի դիմաց
15-րդ թաղամաս, Հանրապետական հիվանդանոցի այգում
Լենինգրադյան-Սեբաստիա խաչմերուկ
Ֆրանսիայի հրապարակ։
«Առավոտյան 08։00-ին միացեք բողոքի ակցիաներին։ Որքան շատ, այնքան մեծ գործ կանենք»,- ասաց Իշխան Սաղաթելյանը։
Ընդդիմադիր գործիչը հիշեցրեց, որ վաղը Հայաստան է ժամանելու Լիտվայի նախագահը, դիմեց շարժմանը միացած քաղաքացիներին՝ միասին գործ ունեն անելու, իսկ 19․00-ին կրկին հավաքվելու են Ֆրանսիայի հրապարակում։










