Պենտագոնը չի հավատում, որ Ուկրաինան առաջիկայում կկարողանա հետ գրավել Ղրիմը Ռուսաստանից. Politico

12:33 • 02.02.23

Ուկրաինական ուժերը դժվար թե կարողանան առաջիկայում հետ գրավել Ղրիմը Ռուսաստանից. այս մասին գաղտնի ճեպազրույցում Պենտագոնի չորս բարձրաստիճան պաշտոնյա ասել է ԱՄՆ Կոնգրեսի Ներկայացուցիչների պալատի Զինված ծառայությունների հանձնաժողովի օրենսդիրներին։

Ինչպես գրում է Politico-ն, Պենտագոնի ներկայացուցիչների նման գնահատականը, անկասկած, կհիասթափեցնի Կիևին, որը թերակղզին հետ վերցնելը համարում է իր հիմնական նպատակներից մեկը:

Politico-ի աղբյուրը հայտնել է, որ ճեպազրույցի հիմնական միտքն այն է, որ Ուկրաինայի հաղթանակը՝ Ղրիմը վերադարձնելու նպատակով հարձակման հարցում երաշխավորված չէ: Այլ կերպ ասած՝ Պենտագոնը չի հավատում, որ Ուկրաինան ունի, կամ առաջիկայում կունենա կարողություն ստիպելու ռուսական զորքերին դուրս գալ Ղրիմ թերակղզուց, որը ՌԴ կազմում ներառվել է 2014-ին:

Politico-ի հետ զրուցած բոլոր չորս աղբյուրն էլ խնդրել է անանուն մնալ՝ գաղտնի ճեպազրույցից մանրամասներ բացահայտելու հարցում:

«Մենք չենք պատրաստվում մեկնաբանել դռնփակ գաղտնի ճեպազրույցները, չենք խոսելու հիպոթեզների մասին կամ ենթադրություններ անենք ապագա հնարավոր գործողությունների մասին», - ասել է Պենտագոնի խոսնակ Սաբրինա Սինգհը՝ տեղեկության արտահոսքի առնչությամբ:

Ղրիմի վերագրավման հարցը ամիսներ շարունակ վիճելի է, քանի որ ամերիկացի և եվրոպացի պաշտոնյաները պնդում են, որ թերակղզին օրինականորեն Ուկրաինայի մաս է, մինչդեռ Կիևին համապատասխանաբար ճեն զինում այդ տարածքը վերադարձնելու համար, եզրափակում է Politico-ն: