Իտալիայի ափերի մոտ խեղդվել է 58 միգրանտ, այդ թվում՝ երեխաներ

21:00 • 26.02.23

Իտալիայի հարավային ափերի մոտ խորտակվել է միգրանտներ տեղափոխող նավ, որի վրա եղել է մինչև 150 մարդ։ Ուղևորների ստույգ թիվը դեռ հայտնի չէ, սակայն Իտալիայի իշխանություններն արդեն ունեն 58 զոհի մասին տեղեկություն, հայտնում է Reuters-ը։

Խեղդվածների թվում կան երեխաներ:

Աֆղանստանից և Իրանից միգրանտներով նավը նավարկել է Թուրքիայից և հարվածել  մարջանախութերին՝ փոթորկի մեջ ընկնելով Կալաբրիայի հարավ-արևելյան ափերի մոտ։

81 մարդ ողջ է մնացել, նրանցից 20-ը գտնվում է հիվանդանոցում՝ վերակենդանացման բաժանմունքում։ Փրկվածներից մեկին ձերբակալել են մարդկանց թրաֆիքինգի համար:

ՅՈՒՆԻՍԵՖ-ի տվյալներով՝ ինը տարվա ընթացքում Միջերկրական ծովում նավաբեկության հետևանքով զոհվել է ավելի քան 26 000 անօրինական միգրանտ, և դա միայն պաշտոնապես գրանցված տվյալների համաձայն։