Զանգվածային ցույցերի ֆոնին Նեթանյահուն պատրաստվում է կասեցնել աղմկահարույց դատաիրավական բարեփոխումների նախագիծը

14:23 • 27.03.23

Իսրայելի վարչապետ Բենիամին Նեթանյահուն երկուշաբթի հայտնել է աղմկահարույց դատաիրավական բարեփոխումների նախագիծը կասեցնելու մտադրության մասին. հիշեցնենք, որ վարչապետի առաջարկած բարեփոխումները երկրում զանգվածային բողոքի ցույցերի պատճառ են դարձել։

Կան պետական ռադիոյի փոխանցմամբ՝ կառավարության ղեկավարն իր որոշման մասին տեղեկացրել է իշխող կոալիցիայի իր գործընկերներին, գրում է Haaretz-ը։

Նեթանյահուն առաջարկել էր սահմանափակել Գերագույն դատարանի իրավունքը՝ վետոյի ենթարկելու խորհրդարանի ընդունած օրենքները, իսկ դատավորների ընտրության վերահսկողությունը թողնել կառավարությանը։

Այս ամենը, ըստ Նեթանյահուի, կոչված է ամրապնդելու իշխանության ճյուղերի միջև հավասարակշռությունը՝ վերացնելով դատական համակարգի նկատմամբ կողմնակալությունը։  Ընդդիմության ներկայացուցիչները պնդում են, որ բարեփոխումը ծառայում է անձամբ Նեթանյահուի և նրա կաբինետի շահերին և խարխլում է պետության ժողովրդավարական հիմքերը։

Հունվարի սկզբից հազարավոր մարդիկ բողոքում են Իսրայելում դատական բարեփոխումների դեմ։ Հանրահավաքներն անցկացվում են շաբաթական առնվազն երկու անգամ, և դրանց մասնակիցների թիվն աճում է՝ մարտի 25-ին այն գերազանցել է 600 հազարը (երկրում 10 միլիոնից պակաս բնակիչ կա)։

Կիրակի՝ մարտի 26-ին, ցուցարարները հավաքվել են վարչապետի տան մոտ. ոստիկանությունը նրանց ցրել է ջրցան մեքենաներով, իսկ երկուշաբթի հազարավոր մարդիկ մոտեցել են Իսրայելի խորհրդարանի շենքին։

Իսրայելում մարտի 26-ի երեկոյան սկսված ինքնաբուխ բողոքի ցույցերի պատճառը վարչապետ Բենիամին Նեթանյահուի՝ երկրի պաշտպանության նախարար Յոավ Գալանտին պաշտոնից հեռացնելու որոշումն էր։

Հայտնի է, որ Նեթանյահուն պաշտոնանկ է արել պաշտպանության նախարար Յոավ Գալանտին մեկ օր անց այն բանից հետո, երբ վերջինս կոչ էր արել իշխող կոալիցիային սառեցնել դատաիրավական բարեփոխումների գործընթացը՝ նշելով, որ այն «պառակտում» է առաջացրել։ Այս մասին հաղորդել է Al Jazeera-ն՝ հղում անելով իսրայելական կառավարության գրասենյակի տարածած հաղորդագրությանը։

Գալանտը՝ Նեթանյահուի աջակողմյան «Լիկուդ» կուսակցության ներկայացուցիչը, դարձել է առաջինը բարձրաստիճան պաշտոնյան, որը շաբաթ ուշ երեկոյան կոչ էր արել 1 ամսով սառեցնել Իսրայելի դատական համակարգը բարեփոխելու վիճահարույց օրենսդրական գործընթացը մոտ 200 000 քաղաքացու ներգրավմամբ տեղի ունեցած ցույցի ֆոնին։ Ըստ նրա՝ իրավիճակ սպառնալիք է Իսրայելի անվտանգության համար։

Կարճ հայտարարության մեջ Նեթանյահուի գրասենյակը հայտնել է, որ վարչապետը պաշտոնանկ է արել Գալանտին: Ավելի ուշ Իսրայելի վարչապետն իր թվիթերյան էջում գրել է, որ «մենք բոլորս պետք է ամուր կանգնենք մերժման դեմ»:

Գալանտն այս հայտարարությունից անմիջապես հետո թվիթերյան իր էջում գրել է, որ «Իսրայել պետության անվտանգությունը միշտ եղել և կմնա իմ կյանքի առաքելությունը»:

Իսրայելի արդեն նախկին պաշտպանութան նախարարի՝ գործընթացը դադարեցնելու կոչը ողջունել էր իսրայելական ընդդիմության առաջնորդ, նախկին վարչապետ Յաիր Լապիդը՝ այն որակելով «համարձակ ու կենսական քայլ Իսրայելի անվտանգության համար»։

Հիշեցնենք, որ Իսրայելում զանգվածային ցույցերը սկիզբ են առել հունվարին այն բանից հետո, երբ իշխող կոալիցիան հայտարարել է իր փոփոխությունների փաթեթը, որը, ըստ կառավարության, անհրաժեշտ է օրենսդիրների և դատական համակարգի միջև լիազորությունները վերահավասարակշռելու համար: Այս փոփոխության դեմ պայքարողները պնդում են, որ այս կերպ իշխանությունը փորձում է սահմանափակել դատական իշխանության գործունեությունը։