Իսպանիայի անվտանգության ուժերը մոտ 7 տոննա թմրանյութ են առգրավել

16:30 • 18.04.23

Իսպանիայի իրավապահ մարմինների աշխատակիցները Ֆրանսիայի, Պորտուգալիայի և Մեծ Բրիտանիայի իշխանությունների հետ համատեղ, Եվրապոլի աջակցությամբ, 50 մարդու են ձերբակալել թմրանյութերի ապօրինի շրջանառության դեմ պայքարի գործողության շրջանակում։ Այս մասին գրել է ТАСС-ը՝ հղում անելով Իսպանիայի քաղաքացիական գվարդիայի երեքշաբթի տարածած մամուլի հաղորդագրությանը։

Հաղորդագրության համաձայն՝ ուժայիններն առգրավել են 4,8 տոննա հաշիշ և գրեթե 2 տոննա կոկաին։

Հետաքննությունը սկսվել է անցյալ տարի, երբ Իսպանիայի իրավապահ մարմիններն իմացել են հանցավոր կազմակերպության գոյության մասին, որը զբաղվում է թմրամիջոցների ապօրինի շրջանառությամբ, և որի ղեկավարները երկրում են։

Գործողությունն իրականացվել է մի քանի փուլով:

Խմբի անդամները հաշիշը Մարոկկոյից տեղափոխում էին Հարավային Ամերիկա, իսկ կոկաինը՝ Ատլանտյան օվկիանոսով և Աֆրիկայի արևմտյան ափով՝ Իսպանիա: