Պայթյունի հետևանքով վիրավորվել է ռուս գրող Զախար Պրիլեպինը

15:03 • 06.05.23

Ռուսաստանի Նիժնի Նովգորոդ քաղաքում այսօր պայթեցվել է  արձակագիր Զախար Պրիլեպինի ավտոմեքենան:

Հաղորդում է ՏԱՍՍ գործակալությունը՝ տեղեկացնելով, որ պայթյունի հետևանքով Պրիլեպինը վիրավորվել է սակայն, նրա օգնականների պնդմամբ, «գրողի վիճակն այժմ բարվոք է»։

Ռուսական մի շարք տելեգրամ-ալիքների պնդմամբ, հարձակման հետևանքով զոհվել է Պրիլեպինի վարորդը։

48-ամյա Զախար Պրիլեպինը մի շարք լայն ճանաչում ստացած վեպերի հեղինակ է, 2016-ից 2018 թվականներին մասնակցել է Դոնբասում ծավալված ռազմական գործողություններին՝ հանդիսանալով Դոնեցկի ինքնահռչակ հանրապետության զինված կազմավորումներից մեկի հրամանատրի տեղակալ։