G7-ի երկրները պայմանավորվել են շարունակել պատժամիջոցային ճնշում գործադրել Ռուսաստանի վրա

13:44 • 13.05.23

«Մեծ յոթնյակի» (G7) երկրների ֆինանսների նախարարներն ու կենտրոնական բանկերի ղեկավարները Ճապոնիայի Նիիգատա քաղաքում ավարտել են եռօրյա բանակցություններն ու հանդես են եկել համատեղ հայտարարությամբ։ Այս մասին հաղորդում է ՌԻԱ Նովոստին։

Բանակցությունների արդյունքում կողմերը հաստատել են ՌԴ-ի դեմ պատժամիջոցներ ու այլ տնտեսական միջոցներ սահմանելու և դրանք կյանքի կոչելու, ինչպես նաև պատժամիջոցների շրջանցմանը դիմակայելու իրենց մտադրությունը։

«Մենք վերահաստատում ենք մեր անդրդվելի վճռականությունը՝ կիրառելու և իրականացնելու պատժամիջոցներ և այլ տնտեսական միջոցներ՝ Ռուսաստանի հնարավորություններն էլ ավելի խաթարելու համար։ Մենք հավատարիմ ենք մնում պատժամիջոցների շրջանցմանն ու դրանցից խուսափելուն ուղղված բոլոր փորձերին դիմակայելու որոշմանը», – ասված է փաստաթղթում։

Կողմերը հայտնել են նաև, որ անհրաժեշտության դեպքում մտադիր են հետագա միջոցներ ձեռնարկել՝ ուղղված Ռուսաստանի ֆինանսական հատվածին։