Շատ անհանգստացած ենք Հայաստան ներմուծվող թմրանյութերի լուրերից․ Վահան Քերոբյան

14:28 • 17.05.23

Մենք շատ անհանգստացած ենք Հայաստան ներմուծվող թմրանյութերի լուրերից։ Այս մասին այսօր լրագրողների հետ զրույցում ասաց ՀՀ էկոնոմիկայի նախարար Վահան Քերոբյանը՝ մեկնաբանելով նախօրեին Իտալիայում Հայաստան ուղևորվող շուրջ 3 տոննա, իսկ այսօր արդեն ՀՀ-ում 1 տոննա կոկաինի առգրավման վերաբերյալ լուրերին։

Ինչպես ընդգծեց նախարարը, իրեն հայտնի է միայն այն տեղեկությունը, ինչը հայտնի է հանրությանը։

«Սա պրոֆիլային հարց չէ, ես այս հարցին չեմ պատասխանի։ Կարող եմ ասել, որ մենք շատ անհանգստացած ենք թե՛ այս նորություններով, թ՛ե Հայաստանում թմրամիջոցների հետ կապված ընդհանուր իրավիճակով», - ասաց նախարարը՝ հավելելով, որ այլ հարցերի չի պատասխանի, քանի որ ինքն այս հարցում մասնագետ չէ։

Անդրադառնալով այն դիտարկմանը, թե արդյոք խնդիրն Էկոնոմիկայի նախարարության տիրույթում չէ, եթե թմրամիջոցների ներկրումն իրականացվել է մրգեր ներկրող ընկերության միջոցով՝ նախարարն ընդգծեց, որ չգիտի անգամ, թե որ կազմակերպության մասին է խոսքը։