Ադրբեջանական կողմը 10-15 րոպե կրակել է կառուցվող գործարանի ուղղությամբ․ Երասխի վարչական ղեկավար

Այսօր Երասխում նորմալ իրավիճակ է, մարդիկ բնականոն կյանքով են ապրում, հիմա բերքահավաք են անում։

Այս մասին լրագրողների հետ զրույցում հայտնեց Արարատի մարզի Երասխ վարչական շրջանի ղեկավար Սարո Այվազյանը:

Նա մանրամասնեց, որ երեկ ադրբեջանական կողմը 10-15 րոպե կրակել է կառուցվող գործարանի ուղղությամբ։ Ըստ Այվազյանի՝ ադրբեջանական կողմը թիրախավորել է մետալուրգիական գործարանը և չի ուզում, որպեսզի այն կառուցվի։

«Արդեն 6-7 ամիս է, որ գործարանի կառուցման աշխատանքներն սկսվել են: Տարուց ավել է, որ կրակոց չի եղել գյուղի ուղղությամբ: Սա առաջին անգամն էր։ Մենք կողմ ենք, որ գործարանը կառուցվի։ Կառավարությունը պետք է դեմն առնի, որ Ադրբեջանը չխոչընդոտի գործարանի կառուցմանը»,- հավելեց նա։

Հիշեցնենք՝ ՀՀ ՊՆ հայտարարել էր, որ հունիսի 13-ին ադրբեջանական կողմը կրակ է բացել Երասխում օտարերկրյա ներդրումներով կառուցվող մետալուրգիական գործարանի ուղղությամբ, ինչի հետևանքով վիրավորում են ստացել Հնդկաստանի երկու քաղաքացիներ։

Հունիսի 12-ին դարձյալ Ադրբեջանը կրակ էր բացել Երասխի ուղղությամբ՝ թիրախավորելով քաղաքացիական ենթակառուցվածքներ։