Չէր ցանկանում մեկնել ռիսկային ուղևորությանը, դա արել էր միայն հայրիկին հաճոյանալու համար. սուզանավի ամենաերիտասարդ ուղևորի ազգականն ուշագրավ մանրամասներ է հայտնել

Ատլանտյան օվկիանոսում «Տիտանիկ»-ի խորտակման վայրը մեկնած ու ճանապարհին պայթած «Տիտան» բատիսկաֆի հինգ ուղևորներից մեկը՝ ազգությամբ պակիստանցի ուսանող Սուլեյմանը, իրականում չէր ցանկանում մեկնել ռիսկային ուղևորությանը: Նա «սարսափած» էր դրանից և անձնակազմին միացել էր միայն հայրիկին հաճոյանալու համար:

Ինչպես գրում է Daily Mail-ը, այս մասին պատմել է զոհված տղայի հորաքույրը: Ազմե Դաուդը պատմել է, որ իր եղբորորդին մեկնելուց առաջ հայտնել էր հարազատներից մեկին, որ ինքն «այնքան էլ պատրաստ չէ դրան, բայց իրեն պարտավորված է զգում հաճոյանալ հորը», որը շատ էր ցանկանում արշավել դեպի նավի խորտակման վայրը:

Պարբերականը մանրամասնում է, որ պակիստանցի գործարար Շահզադա Դավուդը և նրա 19-ամյա որդին, հինգ զոհերից երկուսն էին: Մյուս զոհերն էին OceanGate ընկերության գործադիր տնօրեն Սթոքթոն Ռաշը, Ֆրանսիայի ռազմածովային ուժերի վետերան Փոլ-Անրի Նարգոլեն և բրիտանացի միլիարդատեր Հեմիշ Հարդինգը: Նրանք անհետ կորել էին այն բանից հետո, երբ «Տիտան»-ը սուզվելուց հետո կորցրել էր կապն օպերատոր նավի հետ:

Երեկ՝ հունիսի 22-ին, փրկարարները հայտնաբերել են բատիսկաֆի բեկորները։ Ամբողջ անձնակազմը մահացած է հայտարարվել։