Թաիլանդում 5 ցուցարար կարող է մահապատժի դատապարտվել՝ թագուհու ավտոշարասյան ընթացքը խոչընդոտելու համար

Թաիլանդում հինգ ցուցարար կարող է մահապատժի դատապարտվել՝ 2020-ին հանուն ժողովրդավարության երթի ժամանակ թագուհու ավտոշարասյան ընթացքը խոչընդոտելու համար։

Ինչպես գրում է Daily Mail-ը, վերջին տարիներին հարյուրավոր քրեական գործեր են հարուցվել ուսանողների կողմից կազմակերպված բողոքի ակցիաների մասնակիցների նկատմամբ, սակայն հինգ մեղադրյալը միակն են, որ մեղադրվում են Քրեական օրենսգրքի 110-րդ հոդվածի խախտման համար, որի պարագայում հնարավոր է մահապատիժ:

Թաիլանդում գործող օրենքն արգելում է «թագուհու, ժառանգորդի ազատությանը վնաս պատճառելու գործողությունը»:

Ինչ վերաբերում է բուն միջադեպին, ապա այդ օրը հարյուրավոր ցուցարարներ երթով շարժվել են դեպի Թաիլանդի վարչապետի գրասենյակ, իսկ այդ ժամանակ թագավորական ավտոշարասյունը լիմուզինով, որում եղել են թագուհի Սութիդան և նրա անչափահաս որդին՝ արքայազն Դիփանգկորն Ռասմիջոտին,  գտնվել են նույն ճանապարհին:

Այդ օրվա տեսանյութերում երևում է, որ թագուհու մեքենայի նկատմամբ ակնհայտորեն սպառնալից պահվածք չկա: Ամբոխից լսվում են բարձր, բայց հիմնականում անորոշ բղավոցներ, երբ ավտոշարասյունը, ամուր պաշտպանված ոստիկանության աշխատակիցների կողմից, դանդաղորեն անցնում է ճանապարհով:

Ըստ մեղադրական եզրակացության՝ հինգ մեղադրայլները ցուցարարներին հորդորել են արգելափակել ավտոշարասյունը: Դրանում նաև ասվում է, որ նրանք ծեծկռտուք են սարքել ոստիկանների հետ, ովքեր ապահովում էին մեքենայի ճանապարհը:

Associated Press-ին տված վերջին հարցազրույցում Ֆրենսիսը հերքել է, որ գիտեր, որ թագավորական ավտոշարասյունը մոտակայքում է լինելու և ասել է, որ կոչ է արել մարդկանց հեռանալ թագուհու մեքենայից: