Երբ իրագործվում են ուրիշների գաղափարները, որպես կանոն միշտ իրագործվում են մակերեսորեն. Երվանդ Թարվերդյանը՝ Երևանում ավտոբուսային ուղիների մասին

Երբ իրագործվում են ուրիշների գաղափարները, որպես կանոն նրանք միշտ իրագործվում են մակերեսորեն, ինչպես այս դեպքում։

Ֆեյսբուքյան էջում գրել է «Միացյալ Հայաստան» կուսակցության հիմնադիր-նախագահ Երվանդ Թարվերդյանը՝ անդրադառնալով քաղաքային ավտոբուսների հետ կապված նոր մեթոդի կիրառմանը, որն այս պահին ներդրված է Նորքի զանգվածում․

«Հարգելի Երևանի քաղաքապետարան.

Միացյալ Հայաստան կուսակցության մեր քաղաքական թիմը և անձամբ ես, շատ ուրախ ենք իհարկե, երբ մեր կողմից բարձրացված հիմնախնդիրները երբեմն լուծումներ են ստանում, թեկուզ՝ այնքանով-որքանով:

Վերջերս, քաղաքային ավտոբուսների հետ կապված նոր մեթոդի կիրառումը, որն այս պահին ներդրված է Նորքի զանգվածում (ըստ որի՝ ավտոբուսները պետք է երթևեկեն հատուկ իրենց համար նախատեսված ճանապարհատվածով, որն առանձնացված է ընդհանուր երթևեկությունից) շատ հարցեր է առաջացնում և «ներդրված» բառն այստեղ վերապահումով ենք օգտագործում:

Բանն այն է, որ տվյալ մեթոդի մասին, որպես քաղաքային հիմնախնդիրների ծրագրային դրույթ, մեր քաղաքական թիմը բարձրաձայնել է դեռևս անցյալ տարի:

Պարզապես, երբ իրագործվում են ուրիշների գաղափարները, որպես կանոն նրանք միշտ իրագործվում են մակերեսորեն, ինչպես այս դեպքում: Մենք բազմիցս նշել ենք, որ քաղաքի անհեթեթ խցանումները, որոնք ուղղակի կոլապսի են ենթարկում մասնավորապես Կենտրոն համայնքը, պետք է բեռնաթափել քաղաքային տրանսպորտի երթևեկությունը կանոնակարգելու միջոցով:

Այն է՝ հատուկ ուղիներ բացել միմիայն ավտոբուսների, ինչու չէ նաև տաքսի ծառայությունների համար, որոնք անարգել և ժամանակին կհասնեն իրենց կանգառներ, որպեսզի քաղաքացիների սպասարկումը լինի նույնքան անարգել և հնարավորիս արագ: Հուսով եմ, որպես իրավաբանական անձ, այս հարցը կբարձրացնի նաև Տաքսի ծառայությունների ասոցիացիան:

Ավտոբուսային ուղիներում պետք է բացառել այլ մեքենաների տեղակայումը, որովհետև դրանք ուղղակիորեն խոչընդոտում են ավտոբուսների արագ տեղաշարժին:

Որպեսզի նմանօրինակ ուղիների գործարկումը դառնա առավել արդյունավետ, այն պետք է ներդրվի Երևան քաղաքի բոլոր համայնքներում միաժամանակ և կիրառվի՝ միաժամանակ:

Մեր քաղաքական թիմն այս պահին մշակում է Երևանին առնչվող մի շարք այլ գաղափարներ և իրագործելու է դրանք՝ քաղաքային իշխանություն դառնալու հենց առաջին օրերին»: