Վարշավան ծրագրում է օկուպացնել արևմտյան Ուկրաինան. Շոյգու

Վարշավան ծրագրում է ստեղծել լեհ-ուկրաինական կանոնավոր կազմավորում Արևմտյան Ուկրաինայի հետագա օկուպացիայի համար, ասել է ՌԴ պաշտպանության նախարարության ղեկավար Սերգեյ Շոյգուն գերատեսչության կոլեգիայի նիստում։ Այս մասին գրում է ՌԻԱ «Նովոստի»-ն:

Նա Լեհաստանն անվանել է «ԱՄՆ-ի հակառուսական քաղաքականության հիմնական գործիքը»։  Շոյգուի խոսքով՝ իշխանությունները մտադիր են կառուցել «Եվրոպայի ամենահզոր բանակը», և դրա համար սկսել են մեծ քանակությամբ զենք գնել Վաշինգտոնից և նրա գործընկերներից՝ Մեծ Բրիտանիայից և Հարավային Կորեայից։

«Բացի այդ, պլաններ կան կանոնավոր կերպով ստեղծել, այսպես կոչված, լեհ-ուկրաինական զորամիավորում՝ իբր Արևմտյան Ուկրաինայի անվտանգությունն ապահովելու համար, բայց իրականում այս տարածքի հետագա օկուպացիայի համար»,- հավելել է Շոյգուն։

Ինչպես նշել է գերատեսչության ղեկավարը, «արևմտյան և հյուսիսարևմտյան ուղղություններից Ռուսաստանի ռազմական անվտանգությանը սպառնացող վտանգները բազմապատկվել են»։