Եթե ինչ-որ մեկը Մարությանին տեսանյութից հանել է, դա ամոթալի է. Ավինյան

Եթե ինչ-որ մեկը Հայկ Մարությանին տեսանյութից հանել է, դա ամոթալի է

Էրեբունի վարչական շրջանում նախընտրական քարոզարշավի ընթացքում լրագրողներին ասաց «Քաղաքացիական պայմանագիր» կուսակցության՝ Երևանի քաղաքապետի թեկնածու Տիգրան Ավինյանը՝ անդրադառնալով «Ազգային առաջընթաց» կուսակցության քաղաքապետի թեկնածու, Երևանի նախկին քաղաքապետ Հայկ Մարությանի՝ ՔՊ-ականներին ուղղված մեղադրանքին։

«Ես չեմ ուզում կոնկրետ մեկնաբանել, չգիտեմ ով ինչ տեսանյութ է նկարել։ Եթե ինչ-որ մեկն իրեն տեսանյութից հանել է, դա ամոթալի է: Վահագն Ալեքսանյանը կարող է հրապարակել է տեսանյութը, բայց, վստահ եմ, որևէ մեկին անձամբ որևէ տեսանյութից չի հանել։

Մյուս կողմից այն, ինչը, որ իրականացրել է կառավարությունը, Երևանի ավագանին, ինչը նախաձեռնել էր նաև փոխվարչապետ Տիգրան Ավինյանը և դա վերագրել միայն մեկ հոգու, որն իրականացրել է մի ամբողջ քաղաքական թիմ: Կառավարությունն է այդ վարկի պատասխանատուն, կառավարությունն է այսօր այդ վարկը մարում, նախաձեռնել է իմ գրասենյակը: Առհասարակ խոշոր որևէ ծրագիր մեկ մարդը չի կարող անել, դա պետք է անի քաղաքական թիմը համագործակացությամբ կառավարության, այլ նախարարությունների հետ»,- ասաց Ավինյանը:

Հիշեցնենք, որ Մարությանը գրել էր. «ՔՊ կուսակցության վարչության նախագահի տեղակալը իր ֆեյսբուքյան էջում տարածել է մեզանից գողացած նախընտրական հոլովակը: Դա էլ քիչ է՝ կադրում, որտեղ ես ստորագրում եմ եվրոպական ավտոբուսների  համաձայնագիրը, ինձ կադրից ջնջել են, իմ խոսքը փոխարինել են ուրիշի խոսքով, կեղծված հոլովակի վերջում էլ «ճպպցրել են» ՔՊ-ի լոգոն»։

Մարությանը նաև տեսանյութից տեսապատճեններ էր հրապարակել։