«Հյուսիսային հոսքի» պայթյունին Ռուսաստանի մասնակցության մասին հավաստի ապացույցներ չկան. ZDF և Spiegel

«Հյուսիսային հոսքի» պայթյունին Ռուսաստանի մասնակցության մասին հավաստի ապացույցներ չկան։ Գրել են գերմանական Zweites Deutsches Fernsehen-ն ու Spiegel-ը։

Ըստ լրատվամիջոցների՝ գերմանացի քննիչները չեն կասկածում, որ «Անդրոմեդա» զբոսանավը կապված է խողովակաշարերի վրա խափանարար գործողությունների հետ։

2022 թվականի սեպտեմբերի 26-ին տեղի ունեցած պայթյունների հետևանքով ոչնչացվել են Nord Stream 1-ի երկու գծերը և Nord Stream 2-ի երկու գծերից մեկը, սակայն որևէ մեկը պատասխանատվություն չի ստանձնել դիվերսիոն գործողությունների համար։

Պաշտոնապես Գերմանիայի Դաշնային դատախազությունը շարունակում է անհայտ անձանց հետաքննությունը, սակայն, ըստ ZDF-ի և Spiegel-ի, ենթադրվում է, որ ուկրաինական հետքը ամենահամոզիչն է։ Քննիչների եզրակացությունները մինչ այժմ հստակ մատնանշում են Ուկրաինայի ներգրավվածությունը, և չկա որևէ հավաստի ապացույց, որ ներգրավված են եղել Ռուսաստանի հետ կապ ունեցող անձինք:

Հետաքննության ուշադրության կենտրոնում դեռևս «Անդրոմեդա» զբոսանավն է։ Անձնակազմը, ըստ հետաքննության, պայթյուններից առաջ ու հետո եղել է Ուկրաինայում։ ZDF-ն ու Spiegel-ը, վկայակոչելով հետախուզական գործակալություններին, նշել են, որ այդ մասին վկայում են տեխնիկական տվյալները։

Ըստ հետախուզության՝ «Անդրոմեդան» կարող էր օգտագործված լինել «Հյուսիսային հոսքի» պայթյունի վայր պայթուցիկներ հասցնելու համար։ «Անդրոմեդայի» խցիկում սեղանի վրա հայտնաբերված «ռազմական նշանակության» պայթուցիկի հետքերը «համապատասխանում են խողովակաշարի վրա օգտագործված խմբաքանակին, որն ավելի վաղ պարզել էր հետաքննությունը»։

Որոշ պաշտոնյաներ կասկածում են, թե փորձառու դիվերսանտները կթողնեին մեղքի նման ակնհայտ ապացույցներ: «Անդրոմեդան» Ռյուգեն կղզում Բրեգեն նավահանգստով վարձակալվել է չարտերային ընկերության միջոցով:

Բացի Գերմանիայից, հետաքննությունն իրականացնում են Դանիան և Շվեդիան, որոնց տնտեսական գոտիներում ոչնչացվել են «Հյուսիսային հոսքերի» թելերը։ Ռուսաստանը կատարվածը գնահատել է որպես «միջազգային ահաբեկչության ակտ»։