Պրիգոժինի կյանքից հեռանալը պաշտոնապես հաստատվել է

Ռուսաստանի քննչական կոմիտեն ավարտել է Տվերի մարզում տեղի ունեցած ավիավթարից հետո մոլեկուլային գենետիկական հետազոտությունները։ ՌԴ Քննչական կոմիտեի մամուլի ծառայությունը ТАСС-ին հայտնել է, որ բոլոր մահացածների ինքնությունը պարզվել է, նրանք համապատասխանում են հայտարարված ցուցակին, որում ընդգրկված է նաև «Վագների» ռազմական կազմակերպության հիմնադիր Եվգենի Պրիգոժինը։

«Տվերի մարզում ավիավթարի հետաքննության շրջանակում ավարտվել են մոլեկուլային գենետիկական փորձաքննությունները, որոնց արդյունքների հիման վրա պարզվել է բոլոր 10 զոհվածների ինքնությունը, դրանք համապատասխանում են թռիչքի թերթիկում նշված ցանկին»,- ասվում է հաղորդագրության մեջ։

Ավելի վաղ Ռոսավիացիան հայտնել էր, որ, ըստ ուղևորների ցուցակի, ինքնաթիռում են եղել Եվգենի Պրիգոժինը և «Վագների» հրամանատարներից Դմիտրի Ուտկինը։

Օգոստոսի 23-ին Տվերի մարզում կործանվել է «Վագների» ղեկավար Եվգենի Պրիգոժինին տեղափոխող ինքնաթիռը։ Ռոսավիացիայի տվյալներով՝ կործանված ինքնաթիռում եղել են Պրիգոժինը, ռազմական կազմակերպության հրամանատար Դմիտրի Ուտկինը։ Ընդհանուր առմամբ, տասը մարդ է զոհվել։