Կիևում և Ուկրաինայի մի շարք շրջաններում օդային տագնապ է հայտարարվել

Ուկրաինայի մայրաքաղաք Կիևում և մի շարք շրջաններում օդային տագնապ է հայտարարվել։ Այս մասին հաղորդում է ՌԻԱ Նովոստին՝ հղում անելով Ուկրաինայի թվային փոխակերպման նախարարության առցանց քարտեզներին։

Հաղորդվում է, որ օդային տագնապ է հայտարարվել Կիևում, ինչպես նաև յոթ մարզում՝ Կիևի, Ժիտոմիրի, Վիննիցայի, Չեռնիգովի, Խմելնիցկիի, Ռովնոյի և Տերնոպոլի մարզերում։

Առցանց քարտեզների տվյալներով՝ Կիևի մարզում օդային տագնապի ազդանշանը հնչել է ժամը 04։11-ից (Երևանի ժամանակով՝ 05։11), մայրաքաղաքում՝ 04։39-ից, իսկ մյուս մարզերում՝ ժամը 04։12-ից մինչև 04։33-ը։

Ռուսաստանի զինված ուժերի ուկրաինական ենթակառուցվածքի վրա հարձակումները սկսվել են հոկտեմբերի 10-ին՝ Ղրիմի կամրջի վրա տեղի ունեցած ահաբեկչությունից երկու օր անց, որի հետևում, ըստ Ռուսաստանի իշխանությունների, կանգնած են ուկրաինական հատուկ ծառայությունները։ Հարվածները հասցվում են ամբողջ երկրի էներգետիկայի, պաշտպանական արդյունաբերության, ռազմական հրամանատարության և կապի օբյեկտներին։