Spotify հոսքային ծառայությունն օգտագործվել է հանցավոր ցանցերի կողմից փողերի լվացման համար․ Svenska Dagbladet

Շվեդիայում կազմակերպված հանցավոր խմբերը տարիներ շարունակ օգտագործում են Spotify-ը՝ փողեր լվանալու համար։

Գրել է Svenska Dagbladet թերթը, որի լրագրողները, անանունության պայմանով, զրուցել են տարբեր կազմակերպված հանցավոր խմբավորումների չորս նախկին անդամների և ոստիկանության ներկայացուցիչների հետ։

Նրանք բոլորը հաստատել են սխեմայի գոյությունը։

«Ես կարող եմ 100 տոկոս վստահությամբ ասել, որ դա շարունակվում է։ Ես ինքս մասնակցել եմ դրան»,- ասել է նախկին անդամներից մեկը:

Փողերի լվացման սխեման գործում է հետևյալ կերպ՝ խմբերը գտնում են արտիստի, որը ցանկանում է համագործակցել իրենց հետ: Նա օգտագործում է կազմակերպված հանցավոր խմբերի փողերը, որոնք վերածվել են կրիպտոարժույթի՝ Spotify-ում սթրիմներ թողարկելու համար:

Հանցագործները միշտ ձգտել են ապահովել, որ իրենց դրածո արտիստը լինի հարթակում լավագույններից՝ հոսքերի քանակով։ Դրա համար Spotify-ը նրան վճարել է, իսկ գումարը վերադարձել է կազմակերպված հանցավոր խմբին:

Որքան շատ դիտումներ, այնքան ավելի շատ վճարումներ Spotify-ից: Շվեդիայում մեկ միլիոն ունկնդրման/դիտման համար վճարվում է 40-60 հազար կրոն (3․6-5․4 հազար դոլար):

Հետաքննող ոստիկանը Svenska Dagbladet-ին հայտնել է, որ 2021 թվականին կապ է հաստատել ընկերության հետ, սակայն պատասխան չի ստացել: 

«Spotify-ը դարձել է բանկային մեքենա հանցախմբերի համար: Ուղիղ կապ կա հանցախմբերի և մահացու բռնության միջև», - ասել է նա թերթին:

Ընկերությունը հերքել է այս տեղեկությունը, ասել, որ Spotify-ը չի գտել «որևէ տվյալ կամ անհերքելի ապացույց, որ հարթակը նկարագրված ձևով լայնամասշտաբ օգտագործվում է»։

Ըստ Spotify-ի ներկայացուցչի՝ այս ձևով փողերի լվացումը սովորական խնդիր է արդյունաբերության համար, իսկ ընկերությունը փորձում է հետևել կեղծ հոսքերին ու դրանց դիմաց չի վճարում: