ԼՂ-ից ՀՀ ժամանած 6104 երեխա արդեն իսկ գրանցվել է Հայաստանի կրթական հաստատություններում

Լեռնային Ղարաբաղից ՀՀ ժամանած 6104 երեխա օրվա ավարտի դրությամբ արդեն իսկ գրանցվել է Հայաստանի կրթական հաստատություններում։ Այս մասին Կառավարության «Հումանիտար կենտրոնի» ճեպազրույցի ժամանակ ասաց ՀՀ կրթության, գիտության, սպորտի և մշակույթի նախարար Ժաննա Անդրեասյանը։

«Ինչպես տեսնում եք, այսօր կեսօրին մոտ մի քանի հազարով պակաս էր, և սա նշանակում է, որ մեր դպրոցներում շատ ակտիվ ընթանում է երեխաների ընդգրկման գործընթացը: Ես վստահ եմ, որ առաջիկա օրերին նույնպես կունենանք այսպիսի ավելացումներ, և շուտով կկարողանանք բոլոր այստեղ գտնվող դպրոցահասակ երեխաների կրթության շարունակականությունն ապահովել», - նշեց նախարարը։

Նա նաև ներկայացրեց կրթական հաստատություններում ընդգրկված երեխաների թիվն ըստ մարզերի։ Ըստ այդմ՝ Արագածոտնում 306 երեխա է ընդգրկված դպրոցներում, Արարատում՝ 943, Արմավիրում՝ 467, Գեղարքունիքում՝ 294, Լոռիում՝ 315, Կոտայքում՝ 1033, Շիրակում՝ 216, Սյունիքում՝ 216, Վայոց ձորում՝ 108, Տավուշում՝ 158, իսկ Երևանում՝ 2048։

«Երեխաները հընթացս ապահովվում են գրենական պիտույքներով, նաև դասագրքերի հարցն է կարգավորվում», - նշեց Անդրեասյանը՝ շեշտելով, որ դասագրքերը տրամադրվում են անվճար։

Նա նաև հավելեց, որ մեկնարկում են ուսանողների աջակցության ծրագիրը։ 

«Մենք ուսանողների համար մեկնարկելու ենք կրթաթոշակային ծրագիր, կրթաթոշակի չափը որոշվելու է տվյալ ուղղությամբ, մասնագիտությամբ ուսման վարձի չափի համեմատ: Այսինքն՝ որպես կրթաթոշակի չափ մենք հիմք ենք վերցրել տվյալ բուհերում տվյալ մասնագիտությունով ուսման միջին վարձի չափը»,- նշեց նախարարը: 

Նա տեղեկացրեց՝ երբ ուսանողները առաջին կիսամյակից հետո ցուցաբերեն որոշակի առաջադիմություն, այդ կրթաթոշակի չափը կավելանա: 

«Առնձին քննարկում ենք ուսանողների մյուս խմբի հետ կապված խնդիրը: Մենք ունենք ուսանողների երկու խումբ. ուսանողների մի խումբը ուսանող է եղել ԼՂ հաստատություններում և այս պահին ունի կրթության ընդահատման խնդիր և ունենք ՀՀ բուհերում սովորող ուսանողներ, որոնց ուսման վճարումներն իրականացվել է ԼՂ իշխանությունների կողմից կամ իրենց ծնողների կողմից, որոնք այս պահին դժվարությամբ են վճարումներ կատարում: Այժմ մենք հավաքագրում ենք տվյալները այս խմբի ուսնողների համար: Առաջիկայում այս խմբի ուսանողներին ուղղված աջակցության ծրագիր կլինի»,- եզրափակեց նախարարը: