Վագիֆ Խաչատրյանն ընդամենը պատժվում է Լեռնային Ղարաբաղում ծնվելու և իր պապենական հողի վրա ապրելու համար. Մարուքյան

15:57 • 13.10.23

Ադրբեջանում այսօր մեկնարկել է Լեռնային Ղարաբաղից առևանգված Վագիֆ Խաչատրյանի դատավարությունը։ Նա, իհարկե, հանցագործության հետ կապ չունի, նա ընդամենը պատժվում է Լեռնային Ղարաբաղում ծնվելու և իր պապենական հողի վրա ապրելու համար։ Այս մասին X սոցկայքի միկրոբլոգում գրել է ՀՀ վարչապետի՝ հատուկ հանձնարարություններով դեսպան Էդմոն Մարուքյանը:

Նա նշել է, որ Ադրբեջանում չի կարող լինել արդար դատաքննություն, արդար դատարան և/կամ արդարացի մեղադրանք։ Մարուքյանը հիշեցրել է, որ խոսքը մի երկրի մասին է, որտեղ իշխանությունը չի փոխվել ավելի քան 20 տարի, մինչդեռ այդ ընթացքում Լեռնային Ղարաբաղում ընտրվել է 5 նախագահ: Բացի այդ, Freedom House իրավապաշտպան կազմակերպությունը Լեռնային Ղարաբաղը գնահատել է որպես մասամբ ազատ՝ 37 միավոր ցուցանիշով, իսկ Ադրբեջանը՝ 9 միավորով՝  ոչ ազատ:

«Բոլոր եղած դատավարությունները կեղծիքեն, Եվրոպական կոնվենցիայի ծաղր և համընդհանուր ընդունված միջազգային նորմերի խախտում՝ Ադրբեջանի ստանձնած բոլոր պարտավորությունների համատեքստում։ Ադրբեջանը պետք է վերջ տա մարդկանց հիմնարար ազատություններին և մարդկային արժանապատվությունը նվաստացնող վերաբերմունքին և անհապաղ ազատ արձակի բոլոր գերիներին Հայաստանից և Լեռնային Ղարաբաղից», -գրել է նա՝ կից հրապարակելով դատարանի դահլիճում արված տեսանյութ, որում Խաչատրյանն արտասվում է։