Վրաստանը ցանկանում է, որ Թբիլիսին լինի այն վայրը, որտեղ կստորագրվի մեծ խաղաղության պայմանագիրը. Նիկոլոզ Սամխարաձե
Վրաստանը ցանկանում է, որ Թբիլիսին լինի այն վայրը, որտեղ կստորագրվի մեծ խաղաղության պայմանագիրը. այս մասին Վրաստանի Հանրային հեռուստաալիքի եթերում հայտարարել է Վրաստանի խորհրդարանի արտաքին հարաբերությունների հանձնաժողովի նախագահ Նիկոլոզ Սամխարաձեն։
Նա այս մասին ասել է «3+3» ձևաչափի (Հայաստան, Վրաստան, Ադրբեջան, Ռուսաստան, Իրան, Թուրքիա)՝ Թբիլիսիի համար անընդունելի լինելու մասին խոսելիս:
«Այսպես կոչված «3+3» ձևաչափը մեզ համար անընդունելի է Ռուսաստանի պատճառով, բայց դա չի նշանակում, որ մենք խոչընդոտում ենք ներքին կովկասյան գործընթացները։ Ընդհակառակը, մենք ցանկանում ենք, որ Թբիլիսին լինի այն վայրը, որտեղ կստորագրվի մեծ խաղաղության պայմանագիրը»,- ասել է Սամխարաձեն։
«Մենք ցանկանում ենք տարածաշրջանում առաջնորդի դեր ստանձնել: Հենց այստեղից են բխում Հայաստանի և Ադրբեջանի միջև հարաբերությունների կարգավորմանը նպաստելու մեր ջանքերը: Ինչ վերաբերում է այսպես կոչված «3+3» ձևաչափին, ապա այստեղ մենք ունենք շատ հստակ դիրքորոշում, քանի դեռ Վրաստանի օկուպացված տարածքները չեն ապաօկուպացվել Ռուսաստանի կողմից, և Ռուսաստանը չի ճանաչել Վրաստանի տարածքային ամբողջականությունը, մենք չենք մասնակցի այդ ձևաչափին, բայց դա չի նշանակում, որ մենք չենք զարգացնի երկկողմ հարաբերություններ Թուրքիայի հետ և չենք փորձի հաստատել եռակողմ հարաբերությունների ձևաչափ Վրաստանի, Հայաստանի, Ադրբեջանի մասնակցությամբ: Երբ այս, այսպես կոչված, ձևաչափի մի երկիր կոպտորեն խախտում է մեր երկրի տարածքային ամբողջականությունը և օկուպացնում է մեր երկրի մի մասը, բնականաբար, այդ ձևաչափին մասնակցելն անիմաստ է»,- հավելել է Սամխարաձեն։










