2010-ին 44 հազար ժամկետային զինծառայող կար ՀՀ-ում, 9 տարվա ընթացքում 44%-ով նվազում ունենք. Հայկ Սարգսյան
Վերջին 15 տարվա ընթացքում յուրաքանչյուր տարի ունեցել են ավել քիչ զորակոչիկներ։
Այս մասին հրավիրված ասուլիսի ժամանակ տեղեկացրեց ԱԺ «Քաղաքացիական պայմանագիր» խմբակցության պատգամավոր Հայկ Սարգսյանը։
Նա ներկայացրեց վիճակագրություն, ըստ որի՝ 2010-ին ունեցել ենք ավելի քան 44 հազար ժամկետային զինծառայող, 9 տարվա ընթացքում այդ թիվը պակասել է 44%-ով, այսինքն՝ 2019-ին դարձել է 24 հազար։
«Վերջին 10 տարվա ընթացքում բանակում ծառայողների թիվը գնալով նվազել է, իհարկե, սա ունի նաև դեմոգրաֆիական խնդիր։ Բացի այդ, տարեցտարի ավելի քիչ են ծնվում տղաներ: 1992-ին ծնվել է 36 հազար տղա, իսկ 2001-ին՝ 17 հազար տղա: Բայց պետք է նշեմ, որ անկման տեմպը նվազել է, անգամ աճ ունենք»,- մատնանշեց նա։
Պատգամավորը հույս հայտնեց, որ, եթե Կառավարությունը լավ աշխատի, քաղաքացիներն էլ չլքեն երկիրը, հնարավոր կլինի վերականգնել ծնելիության ցուցանիշը։
Հիշեցնենք, որ ՔՊ-ական պատգամավոր Հայկ Սարգսյանը շրջանառության մեջ է դրել օրենքի նախագիծ, որը հնարավորություն կտա 27 տարին լրացած և պարտադիր զինվորական ծառայություն չանցած քաղաքացիներին ազատվել քրեական պատասխանատվությունից։
Նախագծով սահմանվում է, որ 27 տարին լրացած և պարտադիր զինվորական ծառայություն չանցած քաղաքացիները կարող են երկու տարի ժամկետով ծառայել բանակում, ծառայել 1 տարի և պետբյուջե վճարել 2.5 մլն դրամ, ծառայել 6 ամիս ժամկետով և պետբյուջե վճարել 5 մլն դրամ, ծառայել 1 ամիս ժամկետով և պետբյուջե վճարել 10 մլն դրամ, և վճարել 15 մլն դրամ՝ ծառայության դիմաց։










