Ամենայն Հայոց Կաթողիկոսն ու գործարար Նագիբ Սավիրիսին քննարկել են ՀՀ անվտանգային խնդիրներն ու ԼՂ-ից տեղահանվածների առջև ծառացած մարտահրավերները

23:23 • 28.11.23

Նոյեմբերի 28-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց եգիպտացի ղպտի գործարար Նագիբ Սավիրիսին։ Այս մասին հայտնում են Մայր Աթոռի տեղեկատվական համակարգից։

Հանդիպմանը ներկա էին նաև դոկ․ Փոլ Պողոսյանը, դոկ․ Բրյուս Պողոսյանը, դոկ․Վահրամ Տեր Մաթևոսյանը և պրն․ Վազգեն Յակուբյանը:

Հանդիպմանը մասնավոր անդրադարձ կատարվեց Հայաստանի անվտանգային խնդիրներին և Արցախից բռնի տեղահանվածների առջև ծառացած մարտահրավերներին։

Խոսվեց նաև Արևելքի քրիստոնեական համայնքների խնդիրների և նրանց ցուցաբերվող զորակցության, ինչպես նաև Հայ և Ղպտի Քույր Եկեղեցիների միջև առկա ջերմ հարաբերությունների և սերտ փոխգործակցության մասին։

Զրույցի ընթացքում պրն. Նագիբ Սավիրիսը պատրաստակամություն հայտնեց, ըստ ամենայնի, իր օգտակարությունը բերելու առկա հիմնախնդիրների հաղթահարման գործում։