Գազայի հատվածում Իսրայելի վերսկսած հարվածների հետևանքով զոհերի թիվը հասել է առնվազն 70-ի

16:38 • 01.12.23

Այսօր առավոտվանից Գազայի հատվածում Իսրայելի վերսկսած հարվածների հետևանքով զոհերի թիվը  հասել է առնվազն 70-ի, հայտնում է Al Jazeera-ը:

Ավելի վաղ Գազայի հատվածի առողջապահության նախարարությունը հայտնել էր, որ զինադադարի ավարտից հետո երեք ժամվա ընթացքում Իսրայելի հարվածների հետևանքով առնվազն 32 պաղեստինցի է զոհվել։ 

Հիշեցնենք, որ այսօր Իսրայելի բանակը վերսկսել է ռազմական գործողությունները Գազայում:

Պաղեստինյան ՀԱՄԱՍ խմբավորումը մինչև առավոտյան ժամը 7-ը Իսրայելին չի տրամադրել պատանդների ցուցակը, որոնք պետք է այսօր ազատ արձակվեն: Բացի այդ, ՀԱՄԱՍ-ը  խախտել է հրադադարի պայմանավորվածությունը և հրթիռներ է արձակել Իսրայելի ուղղությամբ։

Ի պատասխան Իսրայելի պաշտպանության բանակը հայտարարել է, որ վերսկսել է խմբավորման դեմ հարձակումները:

Իսրայելի պաշտպանության բանակը նաև նշել է, որ իր կործանիչները ավիահարվածների շարք են իրականացնում Գազայի հատվածում ՀԱՄԱՍ-ի թիրախների ուղղությամբ:

Երկրի վարչապետ Բենիամին Նեթանյահուի գրասենյակի հայտարարության մեջ ասվում է, որ ՀԱՄԱՍ-ը «խախտել է պայմանավորվածությունը, չի կատարել բոլոր պատանդ կանանց ազատ արձակելու իր պարտավորությունը և հրթիռներ է արձակել Իսրայելի վրա»:

«Մարտերի վերսկսման պայմաններում մենք շեշտում ենք, որ Իսրայելի կառավարությունը հանձնառու է հասնելու պատերազմի նպատակներին՝ ազատ արձակել մեր պատանդներին, վերացնել ՀԱՄԱՍ-ը և երաշխավորել, որ Գազան երբեք այլևս չի կարող սպառնալ Իսրայելի ժողովրդին»,- ասվում է հայտարարությունում: