ՌԴ-ն և Սաուդյան Արաբիան համատեղ հայտարարություն են ընդունել Պուտինի և թագաժառանգի հանդիպումից հետո
Ռուսաստանն ու Սաուդյան Արաբիան համատեղ հայտարարություն են ընդունել ՌԴ նախագահ Վլադիմիր Պուտինի և Սաուդյան Արաբիայի թագաժառանգ Մուհամեդ բեն Սալման Ալ Սաուդի միջև բանակցություններից հետո, հայտնում է ՏԱՍՍ-ը։
Կողմերի հայտարարության մեջ, մասնավորապես, ասված է, որ Ռուսաստանը և Սաուդյան Արաբիան կընդլայնեն համագործակցությունը նավթի և գազի ոլորտում, խաղաղ ատոմային էներգետիկայի ոլորտում, կամրապնդեն պաշտպանական համագործակցությունը երկու երկրների ընդհանուր շահերին հասնելու համար:
Կողմերը պայմանավորվել են ակտիվացնել ջանքերը՝ ուղղված միջազգային խաղաղության և անվտանգության պահպանմանը։
Պուտինը և Սաուդյան Արաբիայի թագաժառանգը քննարկել են Իրանը և ընդգծել Թեհրանի՝ միջուկային ծրագրի խաղաղ բնույթին նվիրվածության կարևորությունը: Ռուսաստանը ողջունել է Սաուդյան Արաբիայի և Իրանի միջև դիվանագիտական հարաբերությունների վերականգնումը:
Ռուսաստանի Դաշնության և Սաուդյան Արաբիայի ղեկավարները հանդես են եկել պաղեստինյան տարածքներում ռազմական գործողությունների անհապաղ դադարեցման օգտին:
Ռուսաստանի Դաշնությունը և Սաուդյան Արաբիան աջակցել են Եմենի ճգնաժամի կարգավորմանն ուղղված միջազգային ջանքերին:










