Բազմաթիվ սերիալների սցենարի հեղինակ Նարի Ղազարյանը՝ «ՀոկտեմբերՅան» ապրանքանիշի հիմնադիր

12:00 • 21.12.23

-Նարի՛ «Անուրջներ», «Անցյալի Ստվերներ», «Թաքնված Սեր», «Արդարության որս» և  մի շարք  հեռուստասերիալների սցենարի հեղինակն եք, շուրջ 14 տարի մեդիադաշտում: Ինչպե՞ս որոշեցիք զբաղվել  բիզնես գործունեությամբ:

-Երկար տարիներ  աշխատել եմ և շարունակում եմ գործել մեդիա հարթակում,  մասնագիտության փոփոխություն ամենևին տեղի  չի ունեցել:  Ես մի քանի  բարձրագույն կրթություն ունեմ  և հասունացել էր պահը զբաղվել  նաև իմ մյուս մասնագիտությամբ:

Нет описания.

-Ինչպե՞ս ծնվեց «ՀոկտեմբերՅան» ապրանքանիշը:

- Արդեն մի քանի տարի է՝ ինչ զբաղվում եմ «ՀոկտեմբերՅան» ապրանքանիշի ստեղծմամբ:  Ի սկզբանե  նպատակ ունեի հայրենական արտադրությունում նոր որակ բերել:  Այժմ <<ՀոկտեմբերՅան>> -ը ներկայանում է լաբորատոր հետազոտություններ անցած պղպեղային անանուխի թեյերով: Առաջիկայում բրենդը ներկայացնելու է նաև պղպեղային անանուխի հումքով այլ  արտադրատեսակներ: Այդ մասին առայժմ չեմ խոսի, թող մնա անակնկալ:

-Ինչու՞ պղպեղային անանուխ:

-Պղպեղային անանուխը մշակովի բույս է: Այն Հայաստանի բուսաշխարհում չի հանդիպում: Մշակումն էլ առանձնապես տարածված չէ,  բայց մեծ պահանջարկ ունի ամբողջ աշխարհում: Մենթոլի պարունակությունը պղպեղային անանուխի  մեջ  բավականին բարձր է, ինչն էլ բույսին դարձնում է յուրահատուկ իր  ցեղի մշակաբույսերի մեջ: Մենթոլը բոլորիս հայտնի է քիմքը սառեցնող հատկությամբ: Պղպեղային անանուխի թեյը շատ օգտակար է,  ունի մանրէասպան հատկություն: Բարերար է անդրադառնում  մարսողության և սրտանոթային համակարգի  աշխատանքի վրա: Ի դեպ,  հին հռոմեացիները համոզված էին՝ անանուխի բույրը տրամադրություն բարձրացնող հատկություն ունի: Քաղաքական գործիչներն էլ անանուխի ընձյուղներից հյուսված պսակ էին կրում, քանի որ այն նպաստում էր ուղեղի արդյունավետ օգտագործմանը: Այնպես որ մեր արտադրանքը օգտակար է բոլորի համար:

Нет описания.

-Սցենարիստի մասնագիտությունը բիզնեսում օգնո՞ւմ է:

-Հհարկե՛, շնորհիվ սցենարական ստեղծագործ մոտեցման՝  «ՀոկտեմբերՅան»-ը որդեգրել է բրենդի կրեատիվ մատուցման ռազմավարություն: Բացի որակյալ արտադրանքից՝  մարդկանց հաղորդելու է ջերմ էմոցիաներ, ինչի կարիքը մեր օրերում շատ կա:

-Ինչու՞  «ՀոկտեմբերՅան»:

Առաջինը՝ որովհետև այն աճեցվում է Արմավիրում՝  նախկին Հոկտեմբերյանում,  իսկ Արմավիրի հողը և ջուրը ամենաբարենպաստն է մշակաբույսերի աճեցման համար: Երկրորդը՝ Արարատյան  դաշտավայրի  բնակլիմայական պայմաններում   հոկտեմբեր ամսին կատարվում է պղպեղային անանուխի վերջին մթերումը, որից հետո մշակաբույսը մտնում է արտադրություն և հասնում սպառողին. այսինքն խորհրդանշական «հոկտեմբեր» և «յան» բառերի համադրումն է:

Нет описания.

-Ի՞նչն եք առավել կարևորում աշխատանքային գործընթացում:

-Առհասարակ, թե՛ սցենարական գործունեությունում, թե՛  բիզնեսում ցանկացած աշխատանքի հիմքն ինձ համար գործի նկատմամբ մեծ պատասխանատվությունն է, կատարելագործվելու ձգտումը և ամենակարևորը՝ ազնվությունը: Պետք է ազնիվ լինել այն մարդկանց առջև, ում համար ստեղծում ես որևէ արժեք:

-Հետաքրքի՞ր է, ի՞նչ է բիզնեսը ստեղծագործող մարդու համար:

- Շատերը բիզնես ասելով այն անմիջապես կապում են  մեծ գումարների հետ: Ես  մի փոքր այլ տեսանկյունից  եմ նայում այդ ամենին: Բիզնեսը, իմ դեպքում   արտադրությամբ զբաղվող բիզնեսը հնարավորություն է նոր արժեք ստեղծելու, և դրանով ինչ-որ չափով փոխելու մարդկանց կյանքը դեպի լավը: Բիզնես գործունության միջոցով վաստակած գումարն ինձ համար  գնահատականն է կատարված աշխատանքի, որը խթան է առաջ շարժվելու,  նոր արժեքներ ստեղծելու ճանապարհին:

Нет описания.

-Ընտանիք, ստեղծագործական գործունեություն,  բիզնես… ինչպե՞ս է հաջողվում համատեղել: Չի՞ տուժում արդյոք որևէ օղակ:

Իհարկե հեշտ չէ, բայց մեծ ցանկության և  աշխատասիրության շնորհիվ հնարավոր է  համատեղել և պահել  հավասարակշռությունը:

-Ո՞վ է ձեր նախագծերի, կատարած աշխատանքների առաջին քննադատը և խորհրդատուն:

-Իմ կյանքում այդ շատ կարևոր գործառույթը բաժին է հասել քրոջս,  ոչ այն պատճառով, որ քույրս է, այլ այն պատճառով, որ նրա կարծիքն ու դիտարկումները պրոֆեսիոնալ են և ծանրակշիռ: Ի դեպ քույրս մասնագիտությամբ նաև դիզայներ է և «ՀոկտեմբերՅան» ապրանքանիշի  դիզայները հենց նա է:

Нет описания.

- Եվ վերջում, ի՞նչ կմաղթեք գալիք 2024-ին Ձեր հետևորդներին և  հայ ժողովրդին:

-Խաղաղություն… Խաղաղություն մեր երկրին,  մեր ազգին, թող խաղաղ ու հաշտ լինենք միմյանց  ու ինքներս մեզ հետ, աշխատե՛նք շատ և ազնվորեն, ձեռք  ձեռքի՛ տված փորձե՛նք կերտել լուսավոր ապագա: Խաղաղություն և հաջողություն բոլորիս: