Երևանը 8,5 մետրանոց 171 ավտոբուս ձեռք կբերի. ավագանին ընդունեց 2024 թվականի զարգացման ծրագիրը
Երևանի քաղաքապետարանը 2024 թվականին նախատեսում է 8.5 մետրանոց 171 ավտոբուս ձեռք բերել։ Երևանի զարգացման 2024թ. զարգացման ծրագիրն ընդունվեց Երևանի ավագանու նիստի ընթացքում։
Երևանի քաղաքապետարանի Զարգացման և ներդրումային ծրագրերի վարչության պետի պաշտոնակատար Մերի Հարությունյանը նշեց, որ 249 հատ էլ 19-մետրանոց ավտոբուսներ են ձեռք բերվելու։
«2024 թվականին տրանսպորտի ոլորտում նախատեսվում է իրականացնել մետրոպոլիտենի վագոնների արդիականացում, 249 հատ՝ 19-մետրանոց, և 171 հատ՝ 8,5-մետրանոց նոր ավտոբուսների, 71 նոր տրոլեյբուսների ձեռքբերում, երթևեկության կազմակերպման թվայնացման ծրագրային համակարգի մշակում և ներդրում, 350 լուսացույցների աշխատանքը կանոնակարգելու համար՝ լուսացույցների նոր համակարգերի ներդրում, կանգառասրահների ցուցատախտակների տեղադրում»,- ասաց Մերի Հարությունյանը:
Ըստ նախագծի՝ նախատեսվում է իրականացնել էլեկտրալիցքավորման 420 կայանի կառուցման ու էլեկտրաբուսների լիցքավորման աշխատանքների կազմակերպում: Կոմունալ տնտեսության ոլորտում նախատեսվում է իրականացնել Երևան քաղաքի բազմաբնակարան շենքերի շուրջ 600 վերելակի փոխարինում, հարթ և թեք տանիքների, ինչպես նաև մուտքերի վերանորոգում:
Նախատեսվում են բակային տարածքների բարեկարգումներ, օրինակ՝ Աջափնյակ վարչական շրջանում նախատեսվում է 200 բակային տարածքի վերանորոգում և հիմնանորոգում:










