Լիահույս ենք, որ Իսրայելի իրավապահ համակարգն այլևս չի թույլատրի միջադեպ Պատրիարքարանի նկատմամբ․ Սփյուռքի հանձնակատարի գրասենյակ

12:32 • 29.12.23

Երեկվա դեպքերից հետո Սփյուռքի գործերի գլխավոր հանձնակատարի գրասենյակը կապի մեջ է Երուսաղեմի հայ համայնքի ներկայացուցիչների հետ և խորապես անհանգստացած է։

Այս մասին Tert.am-ի հարցմանն ի պատասխան հայտնեցին Սփյուռքի գործերի գլխավոր հանձնակատարի գրասենյակից՝ անդրադառնալով Երուսաղեմի հայկական թաղամասում տասնյակ իսրայելցիների կողմից տեղի հայերի վրա հարձակման միջադեպին։

Գրասենյակը մտահոգված է նաև ինչպես վերջին ամիսներին, այնպես էլ վերջին տարիներին` «Կովերի պարտեզ»-ի վերաբերյալ Պատրիարքարանի կողմից պայմանագրի ստորագրման կապակցությամբ, որի վերաբերյալ ինչպես հանրությունը, այնպես էլ գրասենյակը տեղեկացվել է իրողությունից հետո։

«Պետք է նշել, որ գրասենյակը որքան էլ անհանգստացած է տիրող իրավիճակով, այնուամենայնիվ  չունի որևէ ազդման լիազորություն, քանի որ հարցը գտնվում է բացառապես իրավական դաշտում, որտեղ պայմանագրի ստորագրող կողմերը պետք է դատական կարգով հասնեն հանգուցալուծման»,- նշեցին գրասենյակից և լիահույս են, որ հրեական իրավապահ համակարգն այլևս չի թույլատրի նման հարձակումներ Պատրիարքարանի ուղղությամբ, և Պատրիարքարանի տարածքը կմնա հայկական։

Հարցի վերաբերյալ էլ ՀՀ ԱԳՆ-ից Tert.am-ին պատասխանեցին, որ հանրային անդրադարձ լինելու դեպքում կտեղեկացնեն։

Հիշեցնենք, որ համացանցում տեսանյութ է հրապարակվել Երուսաղեմի հայկական թաղամասում տասնյակ իսրայելցիների կողմից տեղի հայերի վրա հարձակման վերաբերյալ:

Տեսանյութում երևում է, որ 30 իսրայելցի ներխուժում են Երուսաղեմի հայկական թաղամասի «Կովերի պարտեզ» կոչվող տարածք՝ հարձակվելով քահանաների, բնակիչների և հավատացյալների վրա:

Սադրիչ գործողություններից հայոց հոգևոր ակադեմիայի մի քանի քահանա, սարկավագներ և ուսանողներ, ինչպես նաև բնիկ հայեր լուրջ վնասվածքներ են ստացել։ Ներխուժումից հետո ոստիկանություն են տարվել 6 սադրիչների և հայ համայնքից երկու երիտասարդների։

Նշենք նաև, որ Երուսաղեմի Հայոց պատրիարքարանի դիվանապետ Աղան Գոգչյանը ֆեյսբուքյան էջում ահազանգել էր, որ Երուսաղեմում զանգվածային և համակարգված ֆիզիկական հարձակում է իրականացվել եպիսկոպոսների, քահանաների, սարկավագների և հայ համայնքի այլ անդամների վրա: