Անկեղծ ասած, Փաշինյանի ասածում տրամաբանություն չտեսա. Լավրով
ՌԴ ԱԳ նախարար Սերգեյ Լավրովն ասել է, որ տրամաբանություն չի տեսնում Հայաստանի վարչապետ Նիկոլ Փաշինյանի՝ տարածաշրջանում տարանցիկ ուղիների շահագործման պայմանների մասին հայտարարություններում։ Այս մասին գրում է ՏԱՍՍ-ը:
«Նրանում, ինչ ասել է պարոն Փաշինյանը, որ ուզում է Հայաստանի տարածքով տարանցման համար նույն պայմանները, որոնք կօգտագործվեն Ադրբեջանից Նախիջևան Իրանի տարածքով տարանցման համար, ես տրամաբանություն չտեսա, անկեղծ ասած: Հազիվ թե տեղին լինի համեմատել այս երթուղիները»,- հավելել է ՌԴ արտգործնախարարը։
Երեկ Փաշինյանը, ԱԺ-ում անդրադառնալով Ալիևի հայտարարություններին առ այն, որ եթե ՀՀ-ն չտա ճանապարհը Մեղրիի հատվածով, ապա իրենք կօգտվեն Իրանի տարածքով Նախիջևանին միանալու ճանապարհից, պատասխանել էր, որ ինչ պայմաններով Իրանն է ճանապարհ տալիս Ադրբեջանին դեպի Նախիջևան, այնպես էլ ՀՀ-ն է պատրաստ տալ այդ անցումը Ադրբեջանի հիմնական հատվածից Նախիջևան։ Հարց հնչեցնող ընդդիմադիր «Հայաստան» խմբակցության պատգամավոր Արթուր Խաչատրյանը համակարծիք չէր Փաշինյանի հետ՝ նշելով, որ Ադրբեջանի և Իրանի հարաբերությունները տարբերվում են հայ-ադրբեջանականից։
Նշենք, որ Լավրովը խոսել է այսպես կոչված «Զանգեզուրի միջանցքից»՝ նկատելով, որ վերջին օրերին Հայաստանի և Ադրբեջանի ղեկավարներն իրենց հրապարակային հայտարարություններում անդրադառնում են Ադրբեջանի և Նախիջևանի միջև հիմնական կապի ստեղծմանը:
«Ընդ որում, վարչապետ Փաշինյանն ինչ-որ տեղ ասել է, որ Հայաստանը կտրականապես դեմ է «Զանգեզուրի միջանցքին»: «Զանգեզուրի միջանցքի» մասին երբեք խոսք չի եղել այն պայմանավորվածությունների շրջանակում, որոնք ձեռք են բերվել նախագահ Պուտինի, նախագահ Ալիևի և վարչապետ Փաշինյանի միջև: 2020-ի նոյեմբերի 9-ին ստորագրված հայտարարությունում, որը դադարեցրել է պատերազմը, ասվում է, որ ապաշրջափակվում են բոլոր տրանսպորտային և տնտեսական կապերը, և որ Հայաստանը երաշխավորում է Ադրբեջանի արևմտյան շրջանների և Նախիջևանի միջև երկու ուղղությամբ տրանսպորտային հաղորդակցության անվտանգությունը, իսկ այդ տարնսպորտային հաղորդակցության վերահսկողությունն իրականացնում են ՌԴ անվտանգության դաշնային ծառայության սահմանային ծառայության մարմինները», -ասել է Լավրովը՝ 2023 թվականի ռուսական դիվանագիտության արդյունքների ամփոփմանը նվիրված մամուլի ասուլիսում:










