ՍԴ-ն չի կարող նոր Սահմանադրության տեքստը քննել հանրաքվեից առաջ. դատավորի թեկնածու

14:31 • 28.02.24

Հանրաքվեից առաջ նոր Սահմանադրության տեքստը չի կարող քննության առարկա դառնալ Սահմանադրական դատարանում։

ՀՀ Ազգային ժողովում այս մասին ասաց ՍԴ դատավորի թեկնածու Դավիթ Բալայանը` պատասխանելով պատգամավորների հարցերին։

«Բարձր դատարանում կարող են քննվել միայն սահմանադրական փոփոխությունները»,– ասաց նա։

«Քաղաքացիական պայմանագիր» խմբակցության պատգամավոր Վլադիմիր Վարդանյանը Բալայանից հետաքրքրվեց` այդ դեպքում ո՞վ պետք է իրավական գնահատական տա այդ տեքստին, որը ներկայացվելու է հանրաքվեի։

Բալայանը պարզաբանեց` ՀՀ իշխանությունները պետք է հանձնաժողով ստեղծեն, մասնագիտական հանրույթից էլ ներգրավեն համապատասխան գիտելիքներով օժտված անձանց, որոնք այդ տեքստը կկազմեն։

«ՍԴ դատավորն իրավունք չունի մասնակցելու այդ տեքստի մշակմանը, որը նաև Սահմանադրությամբ է արգելված»,– ընդգծեց նա։