Մադոննայի կարիերայի ամենամասշտաբային համերգի համար Ռիո Դե Ժանեյրոյի իշխանությունները բյուջեից վճարել են 3,94 միլիոն դոլար, իսկ ՀՀ-ն Սնուփ Դոգի չկայացած համերգի համար՝ 6 մլն դոլար
Ամերիկացի փոփ աստղ Մադոննան անվճար համերգ է տվել Բրազիլիայի Ռիո դե Ժանեյրո քաղաքի Կոպակաբանա լողափում:
Համերգը դասվել է երբևէ անցկացված ամենամարդաշատ համերգների ցանկում, որին մասնակցել է 1,6 մլն մարդ աշխարհի տարբեր երկրներից: Համերգը նաև ամենամարդաշատն էր 65-ամյա Մադոննայի 40 ամյա կարիերայի ողջ ընթացքում: Նրա նախորդ ռեկորդը 1987-ին էր Փարիզում, որին 130,000 մարդ էր մասնակցել:


Միջոցառումը սպասարկել է 3,200 ոստիկան, իսկ բեմի պատրաստման վրա աշխատել է 4,000 բանվոր: Բրազիլիան Մադոննայի համաշխարհային շրջագայության վերջին հանգրվանն էր: Աստղը համերգները սկսել էր Լոնդոնից անցյալ տարվա հոկտեմբերին:
Tert.am-ի համար հատկապես ուշագրավ էին միջոցառման ծախսերը: Իշխանությունների հրապարակած փաստաթղթից պարզ է դառնում, որ համերգի կազմակերպման համար բյուջեից ծախսվել է մոտ 3,94 միլիոն դոլար, իսկ համերգի ընդհանուր ծախսը կազմել է 11,7 մլն դոլար:
Հենց երգչուհուն վճարվելիք գումարը 3,3 մլն դոլար էր: Մասշտաբային համերգի մնացյալ ծախսերը հոգացել են մասնավոր ներդրողները: Նախնական հաշվարկներով համերգը Ռիո դե Ժանեյրոյի տնտեսության մեջ ներգրավել է մոտ 57 միլիոն դոլար: Ուշագրավ է նաև, որ համերգի օրերի համար Ռիոյի օդանավակայանում 170 նոր չվերթ էր ավելացվել:

Ուշագրավ է հիշել մեկ այլ աստղի՝ Սնուփ Դոգի երևանյան համերգը, որը ցավոք չկայացավ:
Հայաստանի կառավարությունը Սնուփ Դոգի համերգի համար հատկացրել էր մոտ 6 մլն դոլար՝ 2,1 մլն դոլարով շատ քան Մադոննայի համերգի դեպքում: Այնինչ Սնուփ Դոգի համերգի տոմսերն անվճար չէին և վաճառվում էին 20,000-55,000 դրամով:
Կառավարությունն էլ ակնկալում էր, որ Սնուփ Դոգի համերգին կմասնակցի 20,000-25,000 մարդ: Ինչպես նաև ակնկալվում էր, որ համերգին մասնակցելու նպատակով արտերկրից Հայաստան կժամանի 5,000- 6,000 զբոսաշրջիկ։
Հիշեցնենք, որ Սնուփ Դոգի համերգից ստացած շահույթից ՀՀ կառավարությունը ֆինանսական մասնաբաժին չէր ունենալու:
Հիշեցնենք նաև, որ չնայած շատերը պնդում էին, որ համերգի ծախսերն ուռճացված են և կոռուպցիոն ռիսկ կա, Doping Space ընկերության հիմնադիր Հայկ Սիմոնյանը պնդում էր, որ սովորաբար հենց այդքան են արժենում համերգները:
Հիշեցնենք նաև, որ արտակարգ և լիազոր դեսպան, Սահմանադրական դատարանի աշխատակազմի նախկին ղեկավար Էդգար Ղազարյանը նշել էր, որ Դոպինգ Սփեյս-ի տնօրենը և մի շարք պաշտոնատար անձինք պետք է պատասխանատվության ենթարկվեն հանրային միջոցների վատնման համար:
Հիշեցնենք, որ Tert.am-ին «Դոպինգ Սփեյս» կազմակերպության համահիմնադիր ղեկավար Հայկ Սիմոնյանը հայտնել էր, որ չի բացառում, որ Սնուփ Դոգի համերգը կարող է տեղի ունենալ մայիս-հունիս ամիսներին, ինչպես ավելի վաղ համերգի անցկացումը հավանական էր համարել ԿԳՄՍ նախարար Ժաննա Անդրեասյանը։










