Թուրքմենստանում Ադրբեջանի նախագահի հետ ունեցած շփումների արդյունքներով ունեմ նախնական տպավորություն, որ մենք խաղաղությանը նման տեսք տալու հնարավորություն ունենք. Փաշինյան (տեսանյութ)

Թուրքմենստանում Ադրբեջանի նախագահի հետ ունեցած շփումների արդյունքներով ունեմ նախնական տպավորություն, որ մենք խաղաղությանը նման տեսք տալու հնարավորություն ունենք։ Այս մասին ասել է Նիկոլ Փաշինյանը։

«Ինչպիսի տեսք պետք է ունենա խաղաղությունը՝ Հայաստան Ադրբեջան խաղաղության համաձայնագրի ստորագրումից և վավերացումից հետո։ Հայաստանը պետք է ունենա 29,743 կմ2 տարածք։ Սահմանների սահմանազատումը և սահմանագծումը Ալմաթայի հռչակագրի հիման վրա պետք է տեղի ունենա այս տրամաբանությամբ։

Անկլավ էքսկլավների խնդիրը պետք է լուծվի հետևյալ բանաձևով, սահմանի այս և այն կողմում անկլավներ և էքսկլավներ չպետք է լինեն։ Այսինքն՝ 2 երկրները՝ Հայաստանը և Ադրբեջանը համապատասխան ճշգրիտ չափերի տարածքների փոխանակում պետք է իրականացնեն։

Բոլոր ճանապարհները և հաղորդակցության ուղիները պետք է բաց լինեն «Թրիփ» նախագծի շրջանակում, բայց ոչ միայն «Թրիփ» նախագծի շրջանակում։ Բոլոր հաղորդակցության ուղիները պետք է աշխատեն, բաց լինեն, այդ թվում՝ Հայաստանից Հայաստան՝ Ադրբեջանի տարածքով, և Ադրբեջանից՝ Ադրբեջան՝ Հայաստանի տարածքով աշխատելու և հաղորդակցությունն ապահովելու տրամաբանությամբ։

Հաջորդը՝ Հայաստանը ու Ադրբեջանը իրար որևէ պահանջ չպետք է ներկայացնեն և հանգիստ պետք է թողնեն իրար բոլոր հարցերով և բոլոր հարցերում, ոչ մի պահանջ, ներառյալ, Ղարաբաղ, Գարդման, Շիրվան, Նախիջևան տրամաբանությամբ կամ Արևմտյան Ադրբեջան տրամաբանությամբ։ 

Հիմա հաջորդ և թերևս ամենակարևոր հարցը՝ արդյո՞ք կա իրական հնարավորություն խաղաղությանը այսպիսի տեսք տալու։ Թուրքմենստանում Ադրբեջանի նախագահի հետ ունեցած շփումների արդյունքներով, ես ունեմ նախնական տպավորություն, որ մենք խաղաղությանը նման տեսք տալու հնարավորություն ունենք, և մենք առաջիկայում զբաղված ենք լինելու այդ հնարավորությունը իրագործելով, այդ հնարավորությունը իրականություն դարձնելով»,- նշել է նա։